Ya ta asina leu. Preparashon i guia di hóbennan kompositor i kantante ku a inskribí pa partisipá na festival di Tumba Hubenil 2014 ta kanando segun skema. Despues di pasa den un tayer relámpago di skibi tumba, kompositornan a kumpli i nos por konta e aña’ki atrobe ku 15 bunita tumba pa karnaval hubenil. Kantantenan a pasa den e proseso di skrinen, partisipá na tayer di tumba, kanto i baile, i a risibí nan tumba. Areglistanan hóben a hinka nan skouder bou di e proyekto di hóben pa hóben i a sòru pa areglonan ku ta karga letranan di nos kompositornan hóben dignamente. Ensayonan ta tumando lugá for di desèmber aña pasá, ku un grupo di músiko hóben bou di guia di Arnell Salsbach. Awor a yega e momentu pa pueblo sera konosí ku e 15 kantantenan ku tin e tarea grandi pa bende e komposishonnan ku públiko. Dia 25 di yanüari próksimo hóbennan kreativo, positivo, ku kurashi i hopi smak ta bai partisipá den e dos festival di tumba hubenil komandá pa hóben. Huntu ta sigui un lista ku kantante, título di tumba, kompositor i areglista.