Falta algun dia mas pa Aruba Tumba Festival 46. Diasabra, na cede di SMAC, Comision di Tumba Festival a ricibi tur esnan cu lo competi pa bira Rey of Reina di Tumba pa Carnaval 62. SMAC y Comision di Tumba Festival ta contento y satisfecho di por anuncia cu un total di 17 cantante y 10 banda a registra pa e aña aki. Un bon ambiente tabata reina bow di tur musico durante e anochi di inscripcion y e festival ta mustra di bai bira un espectaculo musical di caliber halto. E aña aki Tumba Festival lo duna homenahe na Sr. Robert Maduro, conoci pa su añanan di dedicacion na musica folklore y participacion na Festival di Tumba. Tambe Sr. Eric “Bubu” Rafael lo hanja un homenahe pa su contribucion como musico pa hopi aña. Desde dialuna 18 di januari carchinan na balor di Afl. 25,- lo ta obtenibel na cede di SMAC, situa na Weststraat 7.
SMAC, Comision di Tumba Festival y tur participante, kier extende nan invitacion na pueblo di Aruba y amantenan di Tumba en particular pa asisti Diasabra 23 di Januari, den Aruba Entertainment Center. Ademas di bon ambiente musical, lo bai tin cushina y bar bon surti. Ta pidi participantenan pa jega trempan na Aruba Entertainment Center pa asina conoce e secuencia di bandanan cu lo bira conoci e anochi ey. Manera ta custumber, e trekmento di lot lo tuma lugar prome cu e festival cuminsa. Cu esaki SMAC Y Comision di Tumba ta publica e lista di participantenan y bandanan competiendo pa e titulo maximo.