E siman nos dilanti ta bira e siman unda nos isla lo conoce un cambio den e structura di parkeo den Oranjestad. Awor nos centro di ciudad ta bai conta cu un systema mas organisa y structura di stacionamento di auto. Parkeermeters lo percura pa regulacion evitando asina tambe autonan para riba acera unda peaton lo mester baha riba caminda pa por pasa of un cantidad grandi di incidente of accidente. Awor tur hende cu bin haci nan compras den centro di ciudad por ta un poco mas sigur cu e por haya un ubicacion adecua y sigur pa staciona nan vehiculo.

E tarifa di e parkeermeters ta bay directamente pa nos compania estatal cual ta Arubus. Arubus ta un di e poco companianan di transporte publico den Reino Hulandes cu no ta cobra e pensionadonan pa transportacion y kier mantene esaki asina. E studiantenan y deportistanan tambe ta haya un tarifa sumamente reduci di 1.25 florin.

Recientemente a haci un analisis unda a keda comproba cu pa cada transporte e costo real mester ta e suma di 5.70 florin. Arubus sin embargo a tuma e decision di ahusta nan tarifa na october y lo bira 3 florin. Cu esaki ainda e compania tin cu absorba un gran parti di e tarifanan pa por cubri e gastonan diario di e compania di transporte publico.

Cu e parkeermeters, Arubus promedio di Aruparking, lo por sigui subsidia entre otro e pensionadonan, y asina nos grandi nan tambe por keda haci uzo di transportacion publico pa yega den tur skina di nos isla.