Willemstad – E tim dinamiko di Parke Tropikal a traha riba un skèdjul di aktividat hopi variá pa temporada di fakansi kaminda grandi i chiki por bin disfruta di nos parke di bestia.Entrante djasabra awor dia 12 di yüli ta kumisa ku Zoovie Picnic Night i Ora Loka.

Zoovie Picnic Night

Entrante djasabra 12 di yüli i riba tur djasabra te dia 9 di augustus lo tin Zoovie Picnic Night. Pa un montante di solamente 5 florin pa persona por disfruta di un pelikula den airu liber riba un big screen. Parke Tropikal a soru pa tin koi kome i koi bebe na bon preis. Uniko kos ku mester trese ta bo kama di pushi, stoel of laken pa sinta riba dje. E pelikula tur siman ta un sorpresa pero tur ta pelikulanan ku tin di haber ku bestia i ta apto pa famia kompleto. E portanan ta habri for di 7 or di anochi i e pelikula ta kumisa mitar di 8 en punto. E fechanan pa e Zoovie Picnic Night ta 12,19, 26 di yüli, 2 i 9 di augustus.

Ora Loka

Tur djasabra i djadumingu durante temporada di fakansi Parke Tropikal ta introdusi tambe Ora Loka. Durante di Ora Lokal di 3 or pa 4 or di atardi ta saka tur e kabritu i karne nan pa nan kana mei mei di publiko. E kabritu i karnenan ta dosil. Durante di  Ora Loka e bishitante por interkambia ku e bestianan mas di aserka i saka potret. Naturalmente esaki ta sosode bou di guia di nos boluntarionan i kuidadonan di bestia paso ta estriktamente prohibi pa duna e bestianan kuminda of koi bebe.

Bouncer i Zoo-bar

Pa seguridat di nos bestianan no ta permiti mas pa drenta parke ku konsumo propio. Pesei awor tin un Zoo-bar ku tin un sortido varia di koi bebe i snacks. Tur dia den siman lo tin bouncer ku e muchanan por bula i pasa pret i triba ur djasabra tin un splash bouncer. Esaki ta un bouncer ku muchanan ta glij kai den un baki di awa. Tur esaki na un preis di famia.

Zootique

Zootique ta e boutique di Parke Tropikal kaminda riba djasabra i djadumingu por kumpra t-shirt, peluche i otro artikulonan i kontribuí asina na fondo pa sigui drecha nos parke. Na Zootique tambe por hanja informashon kon pa bira un Amigu di Parke Tropikal dor di simplemente yena un formulario di standing order. Por hasi esaki for di 5 florin pa luna. Naturalmente tur otro donashon ta bon bini na nos Zootique. Orario di Parke Tropikal ta di djaluna pa djadumingu di 10 or di mainta pa 5 or di atardi. Entrada pa parke manera semper ta gratis.