WILLEMSTAD – Bou di e tema ‘Paranda di Pasku’ Randal Corsen & Friends ta preparando un konsierto den ambiente di Pasku di kita la bamba, alabes rekordando Celia Cruz i La Sonora Matancera. Sosteniendo kuater kantante di taya, esta Yumarya, Mafalda Miguel, Ñaño Rosario i Hendrik de Windt, esaki lo bira un bukèt floral yen di koló i género musikal pa deleitá hende di tur edat i famia kompleto. E konsiertonan ta djamars dia 23 di desèmber i djadumingu dia 28 di desèmber awor na Brakapoti Mei Mei. E karchinan (65 florin) pa e konsierto ta optenibel na 24 Uur Uit de Muur i Mensing’s Caminada. Asina ku e regresá for di Hulanda kaminda e ta presensiá e Konsierto di Reino riba 15 di desèmber, e pianista lokal Randal Corsen ta sigui ensayá ku su amigunan musikal ku ta un meskla di Kurasoleño i Kubano bibá: e perkushonistanan Pernell Saturnino, Eric Brigitha i Gino Samson, e basista Ernesto Paz, e guitarista Alexey Montero i e trompetistanan Igort Rivas i Carlos Gonzalez. E anochi ta kompletamente den ambiente di Pasku ku músika tradishonal di Kòrsou i di Cuba. Ya ku ta rekordá Celia Cruz i La Sonora Matancera, e banda ta honrá pa kompartí tarima ku Mafalda Miguel, e intérprete máksimo di salsa na Kòrsou – loke Celia Cruz tabata pa mundu kompleto. Mesora e oudiensia lo haña oportunidat pa sera konosí ku e generashon nobo representá pa e talentoso kantante hóben yu di tera Yumarya ku sosten di CTB a bini for di Hulanda, kaminda e ta biba i kaminda e ta logrando éksito tras di éksito den salsa. Pa e género mas romántiko tin Ñaño Rosario, miéntras e tumbero Hendrik de Windt lo sa di trese zjeitu ora ta apropiá. Loke por spera ta un bukèt di piesa konosí pa e temporada festivo aki di kambio di aña, hopi ritmo folklóriko i baliabel i ku hende por kanta samsam ku e artistanan riba tarima. E géneronan musikal ku lo presentá ta varia di son pa chachacha, bolero i tumba pa tambú pa selebrá Pasku, tuma despedida di 2014 i prepará pa e aña nobo yen di espektativa nobo.