Willemstad- Panaderia Isa i su pan Ipiranga pa mas di 80 aña ta forma parti di e bon tradishon di nos pueblo pa kome pan di bon kalidat, saludabel i ku bon smak.   Kumpliendo ku su kompromiso ku pueblo di Kòrsou i pa garantisá pan di e mihó kalidat produsí bou di e kondishonnan di kalidat di mas haltu Panaderia Isa resientemente a introdusí su liña di produkshon ultramoderno.  Esaki ta produsí pan chikí na un forma kompletamente outomatisá, kaminda man di hende no ta ni mishi ku e pan desde ku ta meskl’e  e mihó ingredientenan te ku e pan ta den e saku di pan.  Ku e invershon aki awor Panaderia Isa, meskos ku mas di 30 aña pasa a evolushoná e forma di produkshon di su pan Ipiranga, awor tambe  ta produsí su diferente pan chikí na un forma ful outomatisá. Pueblo di Kòrsou di e forma aki por sigui konta ku Panaderia Isa pa e mehorsitu pan, fresku, ku kalidat nutritivo haltu, produsí na e forma mas higiéniko posibel, optenibel rònt Kòrsou i na un preis hustu. Señor Makaay ta Mènedjer di Produkshon i ta traha pa mas di 30 aña na Panaderia Isa. Señor Makaay ta konta “Panaderia Isa semper a perkurá pa su pannan ta traha ku e mihó ingredientenan konforme stándart oropeo haltu.  Pa nos ta importante salu di nos hendenan.  E liña di produkshon nobo ta lo último den mundu di trahamentu di pan.  Sea ta e pan franses, pistolèt, hamburger, hòdòk òf kualke otro di e pannan chikí awor pueblo por ta sigurá ku su pan, banda di ta traha ku tur e ingredientenan nesesario pa un bon dieta diario, ta keda produsí ku un mashin full outomatisá den un ambiente ku ta kumpli ku e eksigenshanan di mas haltu.  E mashin di marka Mecatherm ta di fabrikashon franses.  E ta hasié posibel pa nos produsí nos pan na un forma full outomatisá sin ku man di hende ni sikiera tochi ku e pannan.  E úniko kos ku a keda mesun kos ta e kalidat haltu huntu ku e dushi sabor di nos pannan” Mas di 30 aña pasa Panaderia Isa a kana dilanti i a kuminsá produsí e pan Ipiranga, faborito riba mesa den nos kasnan pa generashonnan largu, di un forma full outomatisá.  Awor rumbo pa futuro a yega e momentu ku Panaderia Isa a outomatisá su produkshon di pan chikí  kompletamente.  E inovashon aki ta hasié posibel tambe pa Panaderia Isa introdusí produktonan nobo ku ántes únikamente tabata keda importá.  Asina desde awe por kuminsá kumpra e pan pistolèt kasi kla pa bai fòrnu na Panaderia Isa.  Pan di kalidat, fresku, kayente anto bros manera abo ke awor ta na bo alkanse ki momentu di dia. Ta kuestion kumpra bo pan kasi kla na bo tienda of mini of supermerkado faborito.  Ward’é den frishidèr anto dia i ora ku bo ta deseá bo ta djis hink’é den fòrnu 5 pa 7 minüt so so i bo tin pan saludabel, kayente kayente, bròs bròs manera ta bo mes ta panadero riba mesa pa kompartí ku bo famia.” “Segun tempu ta kambia e eksigensha di e hende tambe ta kambia.  Kuenta di por kome pan kayente atardi of mainta so ta kos di pasado.  Abo ta disidi ki ora bo ta kome bo pan kayente kayente anto bros manera bo gusta.  E pannan chikí, kasi kla aki, ta loke e hende moderno ke. For di awe bo por haña nan den nos tienda na panaderia mes pero pronto tambe den tur toko, tienda, mini i supermerkado rònt Kòrsou.  Generashonnan a lanta ta konfia den Panaderia Isa i su pannan.  Awor nos ta bolbe dal un paso grandi pa sigui garantisá ku pueblo por sigui konta i kria famianan komiendo Ipiranga i tur e otro pannan saludabel i nutritivo ku Panaderia Isa ta ofresé; tur produsí awor full outomatisá, den ambiente higiéniko haltu i alkansabel manera semper pa henter nos komunidat” un señor Makaay orguyoso a finalisá bisando.