WILLEMSTAD — Direktiva di AMAK a tuma nota di un publikashon djamars 22 di yanüari 2019, den kua ta akusá AMAK di no a mantené su mes na palabrashon pa duna gruponan di karnaval un aporte finansiero durante último añanan. Esaki no ta kuadra totalmente ku realidat, pa e siguiente motibunan:

1. For di 1973 Asosiashon di Músiko a palabra ku Organisashon di Karnaval di e tempu, esta Comite di Karnaval 1971, ku den kaso ku despues di kita tur gastu, tin un saldo faborabel, ku AMAK lo duna un aporte finansiero. Abase di e palabrashon aki, durante 42 aña, AMAK religiosamente a duna un aporte te na un montante di 25 mil florin. Sinku aña pasa ora ku AGKK pa un aña so a bini na remarke pa organisá Karnaval, konsekuentemente e tambe pa un aña so a risibí un montante ku ta korespondé organisashon di karnaval pa kubri gastunan di músika bibu den marcha hubenil. Pues nunka durante e añanan menshoná no a duna ningun aporte finansiero na Gruponan di Karnaval.
2. Na 2015 i despues tambe AMAK a paga sierto gastunan adelantá na entre otro zonido pa Tumba Hubenil,  e hóbennan di Junior All Star a kompañá 15 tumbero di tumba Hubenil i aparte di esei hürnan pa uso di e lokalidat di Festival Center, tur huntu tin un suma di alrededor di 48 mil florin ku nunka a keda kanselá di parti di organisashonnan di karnaval konserní. Hasta kartanan di abogado a bai riba e asuntu nan aki, pero te awe AMAK ni Curaçao Festival Center no a risibí ningun depchi.
3. Manera menshoná bou di punto nr. 1, e aporte finansiero ta posibel ora ku na final ku kita tur gastunan, sobra un saldo positivo, Den e kaso di aña pasa i e aña aki, kaminda AMAK mester lucha ku alma i kurpa pa sera 300 mil florin, kual montante ántes no tabata keda kargá totalmente pa AMAK.  E produkshon aki ta nesesario pa AMAK por logra pa pueblo por haña e transmishon di djabièrnè liber via kanalnan di transmishon lokal.

Resumiendo: Durante último 4 añanan, AMAK no a pasa e suma kustumbrá riba kuenta di esnan ku ta enkargá ku organisashon di karnaval i no na e organisashon ku ta representá gruponan di karnaval, pa e motibunan ariba menshoná.

Pues nunka AMAK no a duna aporte finansiero na organisashon ku ta representá gruponan di karnaval.