WILLEMSTAD- Ministerio di Enseñansa, Siensia, Kultura i Deporte (ESKD) su empeño ta pa informá i komuniká e proseso di pago di debe di estudio bèk na Dienst Utivoering Onderwijs (DUO).

Banda di esaki Ministerio ESKD ke informá i konsientisá èks-studiantenan di DUO pa yega na un mihó maneho di nan debe di estudio.

Tur aña DUO ta kalkulá kua ta e suma anual ku kada persona mester paga bèk riba nan debe di estudio. DUO ta kalkulá e suma anual pa aña 2019 usando e entrada di aña 2017. E èks-studiantenan ku ta deseá pa DUO tene kuenta ku nan entrada, por hasi esaki dor di yena i entregá e siguiente formulario riba wèpsait di DUO: “Verzoek Verlagen Maandbedrag 2019 voor inwoners van het Caribisch Gebied”.

Eks-studiantenan ku nan finansiamentu di estudio a stòp na aña eskolar 2015/2016 mester kuminsá paga bèk na DUO entrante dia 1 di yanüari 2019. Nan tambe mester yena e formulario aki pa asina kuminsá e proseso di paga bèk debidamente.

Kada èks-studiante mester “download”, yena i firma e formulario aki i tambe agregá prueba di entrada di Servisio di Impuesto di Kòrsou di aña 2017. Por haña i download e formulario aki pa medio di e siguiente link: https://www.duo.nl/images/verzoek-verlagen-maandbedrag-2019-voor-inwoners-van-het-caribisch-gebied.pdf

Si e formulario ariba menshoná wòrdu entregá korektamente promé ku dia 31 di desèmber 2018, DUO ta tene kuenta ku e entrada di e èks-studiante den su kalkulashon di e suma anual di pago ku lo ta na vigor for di dia 1 di yanüari 2019. Mester skèn i e-mail e formulario na e siguiente e-mail adres: documenten@duo.nl.

Tur persona ku tin debe di estudio na DUO i ta deseá yudansa pa yena e formulario aki por akudí na SSC. SSC ta habrí bèk dia 3 di yanüari 2019.