Pa kortesía di MCB, sintonisá TeleCuraçao djaweps 11 di sèptèmber

Willemstad – Resientemente Instituto pa Formashon Musikal ku sosten di Maduro & Curiel’s Bank, É Banko Amigu di nos músika, a hasi un homenahe na e gran músiko Macario Prudencia ku aktualmente ta residensiá na Betèsda. Pa tur ku no por tabata presente na e homenahe, MCB a sòru di graba e evento aki den su totalidat i djaweps dia 11 di sèptèmber TeleCuraçao despues di Wega di Number lo presentá un Página Sosial di e homenahe. A tene entrevistanan interesante ku artistanan di taya manera Idelco Koffie, Harry Moen, Hershell Rosario, pero tambe por gosa di presentashon di e muchanan di diferente bario i skol ku ta haña lès di músika grátis serka e maestronan di Instituto pa Formashon Musikal. Alabes por difrutá di e talentonan hubenil di Junior All Star Orchestra ku a kompañá diferente artista lokal manera Erwin Kastaneer, Luti Samson, Mr. Saab i mas ku a kanta hitnan grandi di don Macario. Apertura tabata na enkargo di motor di e proyekto di Instituto pa Formashon Musikal, señor Feco Gomez. Señora Ruthsella Jansen, miembro di gerensia di MCB tambe a dirigí su mes na Macario Prudencia i tur presente. Pues sintonisá TeleCuraçao djaweps dia 11 di sèptèmber despues di Wega di Number pa e reportahe spesial di e homenahe na Don Macario Prudencia.