Minister di Turismo ta anuncia criterio nobo pa nos bishitantenan

Reunionnan interno entre ATA, AAA y Ministerio di Turismo ta tumando luga riba un rapport cu Minister Oduber a pidi specificamente riba mercado Venezolano. E mandatario a bin ta menciona e 3 categorianan di bishitante Venezolano cu nos isla conoce. Un ta e bishitante cu di berdad nos kier atrae traves di un strategia ta esun cu ta keda na Aruba entre 5 pa 7 dia of mas, cu ta gasta y ta na Aruba como turista. Bo tin un otro categoria cu ta esunnan cu ta bini y keda Aruba pa un dia uzando Aruba como Hub y ta bay otro partinan di Mundo. E grupo cu ta keda un anochi tambe ta esunnan cu ta contribui na nos economia. Nan tambe ta keda na un hotel, uza transporte pa yega nan destinacion, nan ta paga nan airport tax, nan ta come den nos restaurantnan pero e siguiente dia nan ta bay. Nan ta contribui sin pone presion riba nos infrastructura. E di tres cu ta bin Aruba pa extrae Dollar y bay bek nan Pais cu ne cu ta keda un par di dia Aruba, no necesariamente hopi tempo. E grupo aki ta bin berdad nan ta raspa carchi, porta nan ta keda na un apartamento, of un cas, pero ta reconoce si cu esaki tambe tin un contribucion na nos economia maske cu ta uno minimo pero ta uno cu kisas no tabata tin.

Hopi biaha ta pinta e mercado aki como uno negativo, mientras cu mester menciona si cu den e analisis a mustra un aumento den e cantidad di bishitantenan Venezolano cu ta keda den hotel. Na aña 2009 e cantidad tabata 52.224 compara cu final di 2014 cual tabata 67.182 pues un crecemento di mas of menos 20% di Venezolanonan cu ta keda den hotel.

E ultimo tendencia negativo awor ta e di 4 categoria ta e grupo cu ta bin Aruba, pasa nan dianan di estadia y busca manera pa keda na Aruba. Minister Oduber ta bisa: “E grupo aki naturalmente ta e grupo cu mas nos tin atencion riba dje y esey ta e grupo cu bo no ta desea. Den su totalidad e ta e grupo minoritario cual ta dificil pa midi exactamente cuanto esaki ta, pero tin esfuersonan cu ta wordo haci.”  E mandatario a gradici e trabou inmenso di Inmigracion cu ta wordo haci conhuntamente cu aeropuerto, cu ta detecta na tempo un gran cantidad di e personanan aki y manda nan bek. Sr. Oduber ta sigui comenta: “Tin biaha ta entre 20 pa 30 hende nan ta manda bek pa dia riba e mesun avion ora nan no cumpli cu cierto criterionan cu tin stipula, of si tin sospecho di no tin e actitud di un turista.”

Recientemente den Minister Raad a tuma un decision cu inmediatamente ta implementa un criterio nobo pa e purba frena e tendencianan negativo cu no ta beneficia nos isla. Minister Oduber ta splica: “Nos a notifica mesora tur instancia tanto local y internacional cu desde awe ta subi e grado cu un minimo di 500 Dollar cash cu bo mester tin den bo posesion na yegada di Aruba y cada dia cu un persona keda Aruba e mester tin 200 dollar. ”  Por ehempel pa si ta un dia e pasahero ta keda Aruba e mester tin 500 Dollar cash den su posesion, si e ta keda 2 dia tambe e mesun cantidad di 500 Dollar ta vigente y si e keda tres dia e ta bira 600 dollar etc.

Cu e decision aki kier frena entre otro tendencia di esunnan cu ta bin Aruba y busca manera pa keda, pero tambe kier disminui e grupo cu ta contribui lo minimo cu nos economia cu ta esun cu ta raspa carchi purbando di keda cu mas di e placa posibel den nan mesun cartera.