Willemstad,- Despues di un eksitoso estreno na Boneiru, djabièrnè 27 di novèmber próksimo, Bonaire Youth Outreach den koperashon ku Teatro Luna Blou, lo estrená e pelíkula Makistá na Kòrsou. Ta pa promé biaha ku ta estrená un pelíkula na Papiamentu traha dor di Bonerianonan na Kòrsou.

E pelíkula Makistá ta simbolisá kon dos kompania Boneriano ta purba na kibra otro pa asina nan por krese. Na dado momentu tur dos kompania ta haña nan mes forsa pa traha huntu. Durante di e periodo aki i den un forma kómiko e kompanianan ta purba na kibra otro.

E palabra Makistá ta un palabra bieu di Papiamentu ku ta nifiká: tene un otro abou pa bo por subi. Pues, ku e pelíkula Makistá, Bonaire Youth Outreach Foundation (BYOF) ke enfatisá e importansia di traha huntu. BYOF ta un fundashon ku a lanta for di desèmber 1998 ku ta purba na forma hóbennan Boneriando pa nan ta lidernan di mayan. Un parti di e formashon ta enserá tambe uso di media i teknologia pa e hóben por komuniká su mensahe na komunidat.

Pa logra esaki BYOF ta duna e hóbennan di Boneiru lèsnan di media grátis via di e programa internashonal “Adobe Youth Voices” (AYV). Via di e programa AYV, hóbennan Boneriano a gana diferente premionan internashonal den e último añanan i tambe risibí algun scholarships pa por sigui studia den e mundu di media. Tambe BYOF ta logra forma hóbennan pa nan ta lidernan di mayan dor di duna nan un bos via di programanan di radio i tv.

Na 2009 BYOF a estrená su promé pelíkula yama Den Gara 2, sigui na 2011 ku Nayza (finansiá pa UNESCO) i na 2014 BYOF a entrená Den Gara 3 (ku pa un esena ta filma na Hulanda). Resientemente BYOF a gana e 48 Hour Film Project challenge di Kòrsou ku e short film “Big ‘N Mac”.

Awó, BYOF en den koperashon ku Teatro Luna Blou ta duna e pueblo di Kòrsou e oportunidat di disfrutá di e pelíkula kómiko Makistá. Makistá lo estrená djabièrnè 27 di novèmber pa 20:00 na Teatro Luna Blou. Makistá ta dura 1ora i mei i karchinan ta optenibel na Time to Time ( Saliña), Pomp sta. Maria òf na teatro Luna Blou tres ora promé ku e funshon na balor di NAF 15,00. Pa mas informashon por yama na 462-2209 òf bishita nos website na www.lunablou.com òf nos facebookpage.