Willemstad – Ora dos titán den mundu di entretenimentu topa otro, magia musikal ta keda krea. Ku hopi antisipashon Clifton End ta lansa su kolabrashon tan antisipa titula ‘Slow Dance’ ku e talentoso kantante Ephrem J. Clifton semper tabata un inspirashon musikal pa Ephrem J, espesialmente na komienso di su karera musikal unda e tambe tabata milita den banda di ritmo kombina.

“Semper nos tur dos kier a traha huntu, pero nunka tempu a permití”, Clifton a splika. E kolaborashon a keda realisá masha orgániko, ora Ephrem tabata na Hulanda pa algún presentashon i a topa ku Clifton, unda porfin nan a drenta studio pa graba e produkshon ku a bira ‘Slow Dance’.

‘Slow Dance’ Ku ‘Slow Dance’, Clifton i Ephrem J ta invita nan respektivo amor pa un baile sensual, unda nan ta splika kon nan ta desea di tin n’e pa semper den nan brasa. Nan ta invité pa baila e Kizomba aki pa asina nan konekta ku otro. Según Clifton, ‘Slow Dance’ ta un kantika ku un toke di R&B, algu ku semper Clifton ta inkorpora den su músika. E kantika ta kombina ingles i spaño i tabata un kolaborashon entre Clifton, Vincent ‘Junior’ da Silva i Ephrem J, kende a skibi su mes parti. Clifton ta atmiti ku su proseso ku komposishon ta poko úniko, unda e ku Vincent a kuminsá ‘brainstorm’ riba e konsepto i a sinta adapte huntu. “Vincent sa ku ki ora ku mi graba, e tin ku laga mi na pas pa mi por hasi mi kos. Pues ela hala kita i e mes un anochi m’a graba e stem”, Clifton a splika.

E produkto final ta papia pa su mes, un dushi interpretashon unda un i tur por basila riba dje. “Tabata dushi pa graba un Kizomba atrobe”, Ephrem a splika, después di a profila su mes ekstensivamente den e genero di bachata. Ephrem J tambe ta trahando duru pa trese mas produkshon pa su fanátiko nan lokal i internashonal. Aktualmente e ta grabando algún videoclip i ta preparando pa otro gira na Argentina i Ecuador.

Sinta Ros Clifton End ta na Kòrsou e dianan aki pa un tremendo presentashon durante Simplicity – Tropical Edition, ku ta tuma lugá día 9 di November 2019 na Brakkeput Mei Mei i ta keda organisá pa Fundashon Sinta Ros. E fundashon ta opera kompletamente riba fondo i donashon, ta yuda e muhé ku ta enfrentando kanser di pechu na Kòrsou. Nan ta organisá varios evenementu henter aña pa rekauda fondo i e fiesta di Simplicity ta birando día pa día más popular. Clifton lo tei espesialmente pa duna sostén na e noble kausa aki, huntu ku TUNE i GENTS tres chic. Karchinan ta na rason di 55,- ANG. i ta disponibel serka miembronan di organisashon i na e puntonan di benta konosi.

Bo por chèk e video klip di ‘Slow Dance’ riba You Tube na https://youtu.be/wgcI3IodLBM. Pa mas informashon siguí Clifton End riba ritnan sosial na e página di Facebook/BuzzBinProductions of mail na Media@buzzbinproductions.com pa más informashon.