Nos di Fundashon Karnaval Banda Abou a bin ta tuma nota di artíkulo nan ku a ser publiká den kolumna di  un página di un matutino, den diferente programa na radio i tambe den un programa di televishon ku nòmber di un persona ta wòrdu menshoná komo posibel presidente nobo pa Fundashon Karnaval Banda Abou.

Esaki a trese basta prekupashon serka habitante nan di Banda Abou i tambe di otro partinan di Kòrsou mirando ku nos ta boga ku dado kaso esaki mester sosodé nos lo sa di duna e enkargo aki na esun ku nos ta kere por hasi e trabou bou di nos hendenan mes di Banda Abou.

Nos ke informá ku e rumor  nan aki i tambe ku kosnan a pega na Sektor di Kultura NO ta kuadra ku realidat. Mirando ku Sektor di Kultura no tin influensia den nombramentu di un presidente den un direktiva di un organisashon ku tin su mes statutonan ku ta indiká kon esaki mester wòrdu nombrá.

Nos ta lamentá ku ta uza nòmber di hende sin nan pèrmit pa mal informá un pueblo. Un realidat ta ku e aña aki e Fundashon a konfrontá problemanan a konsekuensia di ménos aporte di spònsernan. No opstante esaki e direktiva aktual ta trahando duru pa solushoná esaki nan mas lihé posibel.

Pa loke ta trata organisashon di Karnaval 2020 na Banda Abou esaki ta na enkargo di Fundashon Karnaval Banda Abou. Mas detaye tokante presidensia, direktiva i kon kosnan lo sigui  nos lo duna  den un rueda di prensa ku lo tuma lugá pronto.

Pues nos ta invitá boso komo prensa responsabel pa keda pendiente pa nos konferensiá di prensa

Direktiva Fundashon Karnaval Banda Bou