WILLEMSTAD – Pa e Festival di Pueblo ku Fundashon Bon Intenshon ta organisá dia 2 di yüli awor, lo sera Kaya Grandi (Breedestraat) den Otrobanda pa tur tráfiko motorisá, for di Neto Bar te Awasá (Brionplein). Esei ta pa fasilitá e aktividatnan ku ta preparando pa e dia festivo aki.

Lo tin 5 stage riba e ruta ei. Kada un a haña un nòmber. Nan a bira Stage Macario Prudencia, Stage Boy Dap, Stage Rudy Plaate i Stage Doble R, miéntras ku e Stage den kurá di misa Santa Ana lo karga nòmber di nos gran Elis Juliana.

Riba e stagenan di nos músikonan, lo tin aktuashon di: A Piacere, e típikonan Andrea, Elegansia, Pa Bo Gosa, Sta. Rosa, Pasa Bon i Sòpitu. Ademas tin presentashon di Norman Moron i Kuarteto, Kuarteto Krioyo, Johnny Kleinmoedig i Konhunto, i Arnell i Orkesta.

Mientrastantu Stage Elis Juliana lo ta esenario pa diferente aktuashon kultural, manera baile, deklamashon, obra teatral, pintamentu i diferente presentashon mas.

Pa 7or di anochi, riba Stage Doble R riba Brionplein, Arnell i Orkesta lo klousurá e tremendo Dia Krioyo di e promé edishon di Festival di Pueblo aki ku un aktuashon úniko. Dia 2 di yüli, Dia di Bandera, Festival Di Pueblo: Pèrd’é pa bo Pèrdè.