WILLEMSTAD.- Despues di un periodo di oudishon Instituto di Formashon Musikal a yega na e 14 kandidatonan ku a klasifiká pa partisipashon na Tumba Hubenil 2015. Despues di kuater fecha di evaluashon (8,9, 13 i 16 di òktober 2014) kaminda a skor e kandidatonan riba nan: entonashon, kompas, bos, artikulashon, presentashon, kada un dje 31 kandidatonan a ser evaluá i klasifiká den e siguiente 3 kategorianan: 1. Malu (hopi problema ku aspektonan tékniko básiko di kanto manera entonashon, oido, dominio di bos ets.; 2. Mediokre, fayonan hasi dor de sea insufisiente preparashon, nerviosismo, negligensia, falta di konsentrashon i ménos talentoso; 3. Sufisiente.

OPORTUNIDAT

A base di e dianan di evaluashon Instituto pa Formashon Musikal a opta pa duna kandidatonan ku a kai den kategorianan ‘mediokre’ i ‘sufisiente’ un oportunidat èkstra pa ser evaluá riba djasabra último, 18 di òktober 2014.

KLASIFIKA

Despues dje evaluashon di 18 di òktober e 14 kandidatonan ku a klasifiká pa partisipashon na Tumba Hubenil 2015 ta: 1. Denzel Mercelina; 2. Aaliya Heyliger; 3. Cedione Hanse; 4. Shaquira Noor; 5. Lisanne Thomasia; 6. Rendrick Djaoen; 7. Tarique Martinus; 8. Unella Nepomuceno; 9. Shently Zimmerman; 10. Charelson Mercelina; 11. Naëmy Kirindongo; 12. Tiffany Celestijn; 13. Denzel Gregg i 14. Tariq Hooi.

PREPARASHON

Awor ku oudishon ta tras di lomba e preparashon di e 14 kandidatonan ta bai kuminsá kaminda lo tene diferente ‘workshop’ pa e hóbennan di entre otro kantamentu i presentashon. M.E.O. huntu ku Instituto pa Formashon Musikal i Fundashon Ser’i Bientu lo tene próksimamente un rueda di prensa kaminda lo duna tur detaye relashoná ku Festival di Tumba Hubenil 2015.