WILLEMSTAD — Instituto pa Formashon Musikal djaweps awor dia 30 di yüli entre 10 or di mainta pa 1 or di mèrdia, lo tene un oudishon di kanto pa hóbennan di entre 8 pa 14 aña. Durante di e oudishon aki, lo bai saka hóbennan ku lo por haña lès di kanto riba nivel profeshonal i eventualmente esnan ku tin mas eksperiensha di kanto, lo por ser inkorporá den Junior Allstar Orchestra. Ta bon pa menshoná ku esnan ku keda selekshoná pa Instituto pa Formashon Musikal ta haña lèsnan di kanto, di sòlfeo, di teoria i tambe lo haña instrukshonnan riba un instrumento di kuèrdè o piano. Kontinuamente Instituto pa Formashon Musikal ta risibí yamada di mayornan ku ke haña un oportunidat pa nan yunan bin haña lès di músika i kanto. Den e kaso aki tur esnan ku partisipá na e oudishon lo bini na remarke pa haña e instrukshonnan musikal adekuado. Pues un yamada na tur mayor pa presentá ku nan yu, djaweps dia 30 di yüli entre 10 or pa 1 or na Curaçao Festival Center. Na yegada na festival Center ta registrá i kada ken ta haña un number pa e oudishon. Instituto pa formashon Musikal pa medio di esaki ta gradesí Maduro & Curiel s Bank, Reda Sosial, Samenwerkende Fondsen i CORE NV pa nan aporte ku ta garantisá kontinuashon di e proyekto positivo i eksitoso [pa nos hóbennan di Kòrsou.