ORANJESTAD, Aruba – 16 di November 2015: Despues di lunanan di preparacion, canando paralelo cu trabounan di renobacion y construccion, awor ta asina leu cu e fin di siman aki Joe Laveist Sport Park ta habri su portanan oficialmente. E eventonan ta cuminsa for di diabierna 27 y lo sigui te cu diadomingo 29 di november 2015 den e hoya di facilidad deportivo situa na San Nicolas. Diabierna dia 27 di november pa 6or di atardi ta tuma luga e apertura oficial di e facilidadnan, den cual lo honra esunnan cu a sostene e sport park y grandinan den e mundo di deporte. For di 9’or di mainta lo inicia cu e encuentro Internacional di volleyball, cual ta un oportunidad pa tur mucha presencia y asina cuminsa sondea posibilidadnan pa join un team di deporte.

Tin masha expectativa pa e encuentro internacional di baseball entre Corsou y Aruba. Wild Cats di Corsou lo enfrenta All Star Team di Aruba, mientras cu den Beach Volleyball lo tin 3 team masculino cu lo midi forsa cu e atletanan di Aruba. Boxeo tambe ta riba e lista di eventonan. Ta un dicha pa mira asina hopi encuentronan bek den Joe Laveist Ballpark. Joe Laveist Sport Park tin luznan nobo, tribuna y daknan di tribuna nobo, un score board moderno cu ta traha cu “remote control”, facilidadnan pa reporteronan transmiti wega, un veld completamente renoba y un “zandbak” pa haci e deportenan di beach, manera beach volleyball. E di tres fase di e renobacion y expansion di Joe Laveist Sport Park ta encera construccion di dos sala grandi pa “indoor sports facilities”, manera taekwondo, basketball, karate, boxeo, etc.

Despues di su apertura oficial Joe Laveist Sport Park ta bek na disposicion di San Nicolas y e comunidad di Aruba en general. Hinca e fecha den bo agenda, e invitacion sigur ta pa un y tur en special e hubentud pa bin disfruta di deporte cu lo inicia cu e re- apertura dia 27 di November, 28 di November e MLB all Stars Game y diferente weganan dia 29 di November. “Take me back to the Ball Game! Aruba Get ready….The Pot is heating up on the stove”. Bishita nos pagina riba Facebook y keda al tanto di tur loke ta bay pasa riba e dianan importante aki pa San Nicolas, Deporte y Aruba en general.