WILLEMSTAD, Kòrsou:  Despues ku a anunsiá e proyekto pa e aña aki i a divulgá tur artista ku lo presentá durante e fin di siman di 3 i 4 di yüni próksimo, otro siman lo kuminsá ku e ‘early bird special’. Otro siman djamars dia 29 di mart, un kantidat di karchi limitá lo keda pone na benta pa 99 florin. E karchinan lo ta 99 florin te ora ku e kantidat designá pa e spesial tèrminá. “Op is Op”. Preis regular di e karchi lo ta 125 florin pa kada anochi respektivamente.

Preparashonnan ta bayendo hopi bon di akuerdo ku Showbizz International ku e aña aki por konta ku sosten di Destination Curaçao pa organisashon di e di dos edishon di Viva la Música Latina Curaçao. Manera tur hende sá, riba djabièrnè lo tin presentashon di ‘El Mayimbe de la Bachata’  Anthony Santos i  tambe Anacaona  ku ta un orkesta femenino di Cuba ku un ‘sasón’ i un ritmo realmente kontagioso.  Tambe, Kòrsou su maestro Gregory Colina i su Orkesta lo tei ku “Tributo a Celia Cruz”. Pa djasabra anochi lo tin presentashonnan elektrisante di Gente De Zona i Elvis Crespo, ámbos galardoná i numeroso biaha nominá ku Latin Grammy Awards.  Manera anteriormente anunsiá, e aña aki riba djasabra tambe lo tin un presentashon lokal. E anochi aki ta pa un tòp músiko manera Axel Pikero presentá un deskarga musikal ku, pa un solo anochi Orkesta Dreams.

“Viva la Música Latina Curaçao” lo tuma lugá riba e parkinglot di SAMBIL, meskos ku aña pasá. Entrada pa e konsierto ta 125 florin pa kada anochi; kuminsando djamars awó dia 29 lo por kumpra karchi pa 99 florin den e ‘Early Bird Special’ ku a antisipá durante e konferensia di prensa. Buska bo karchi di entrada na e punto di benta mas serka dibo: Mensings Caminda, Albert Heijn na Zeelandia, Ofisina di korant Amigoe, Licores Maduro i na Sambil.