Maui Bottse i George Mau-Asam a titulá kampion

Willemstad – Den fin di siman tras di lomba a tuma lugá riba kanchanan di CSC na Damacor e “5th Old Timers Tennis Tournament” patrosiná pa Maduro & Curiel’s Bank, Wimco i GH Car Rental. E torneo aki a konta ku 80 partisipante, repartí den 40 pareha, kual a kompetí durante tres dia kontra otro. Djasabra anochi e 12 mihó parehanan tabata konosí i a pasa pa hunga den e knock-out bracket pa asina saka e 4 mihó parehanan pa partisipá den e semi-final. Den e semi-final 1, e pareha formá pa Tyrone Martin i Gwenny Visser a gana di e pareha formá pa Darren Hollander i Aimo Fraai. Den e semi-final 2, e pareha formá pa Maui Bottse i George Mau-Asam a sali viktorioso riba e pareha formá pa Betto Bakhuis i Harold Kuwas. Den e gran final, apesar ku Tyrone Martin i Gwenny Visser a duna un bon bataya, Maui Bottse i George Mau-Asam a gana i titulá kampion di “5th Old Timers Tennis Tournament”. Fanátikonan di tènis a gosa di un ambiente sumamente agradabel mientras nan tabata disfrutá di e diferente partidonan. Durante 3 dia un kantidat grandi di fanátiko a presensiá e weganan i e ceremonia di entrega di premio.

Ryan Hollander i e tim organisadó di “5th Old Timers Tennis Tournament” ta gradisí e patrosinadónan Maduro & Curiel’s Bank, Wimco i GH Car Rental ku pa e último añanan ta hasi e torneo aki posibel i sigur un aktividat deportivo hopi éksitoso. Un danki ta bai tame na tur partisipante i fanatiko ku sin boso aporte e torneo aki lo no por tabata posibel. Un danki spesial tambe na Samir Daou i un i tur ku di un forma òf forma a yuda pa hasi e torneo aki un éksito rotundo. Keda pendiente pa “The 6th Old Timers Tennis Tournament”.