E aña aki, talentonan lokal di Kòrsou, lo partisipá na North Sea Jazz Festival na Rotterdam, ku diferente aktuashon di e Orkesta Húbenil di Dennis Aalse.

For di 2010 Fundashon Bon Intenshon i Mojo Concerts ta organisá Curaçao North Sea Jazz Festival. Komo resultado di e koperashon aki Fundashon Bon Intenshon a negoshá partisipashon di Orkesta Húbenil Dennis Aalse na North Sea Jazz Festival Rotterdam. E orkesta renombrá aki ta funda pa dirigente, trompetista i dosente di músika Dennis Aalse, i ta konsistí di 15 talento entre 10 i 20 aña i ta forma un parti importante di e akademia di músika di Dennis Aalse. E formashon di e elenko músikal di e orkesta di Dennis Aalse ta algu apart: banda di e okupashon standart di un big band, konsistiendo di sekshon di bras, sekshon rítmiko i kanto e orkesta Húbenil di Dennis Aalse ta konsistí tambe di chèlo, fió i flouta. Algu típiko di e orkesta aki ta e plaser ku nan ta toka ku n’e, presentando un repertorio masha alegre, ku eksitonan manera ‘Uptown Funk’, ‘All That Jazz’ i ‘Oh When the Saints Go Marching In’. Orkesta Húbenil Dennis Aalse a toka diferente biaha na selebrashon International Children’s Rights i durante Curaçao International Film Festival Rotterdam; e Orkesta ta un orkesta eksperenshá i ta hambrá pa nan partisipashon na North Sea Jazz Festival na Rotterdam!

Durante e festival di North Sea Jazz na Rotterdam 2018, di 13 pa 15 di yüli 2018, e Orkesta Húbenil di Dennis Aalse lo presentá tur dia riba diferente stage. E presentashon di Orkesta Húbenil Dennis Aalse ma North Sea Jazz Festival na Rotterdam ta organisá i finansiá pa Fundashon Bon Intenshon.