WILLEMSTAD — Despues di e éksito di BON DOET, ARUBA DOET i NL DOET, Kòrsou a ranka sali den 2014 ku e promé edishon di CURA DOET riba 21 i 22 di mart 2014. E evento tabata tremendo mirando ku mas ku 132 tarea di organisashonan a haña yudansa di mas ku 2600 boluntario durante 2 dia, pasando tremendo i logrando hopi! CURA DOET tabata un ola positivo kaminda suidadanonan a bai man na obra rònt Kòrsou. Den 2015, CURA DOET ta pinta di bira aun mas grandi. Curaçao Cares, e organisadó di CURA DOET ta sumamente entusiasmá ku e manera ku e akshon a krese i ta sigui krese. E bunita di CURA DOET ta ku durante dos dia lo krea konekshonan mas fuerte entre bisiñanan, skolnan i kasnan di hende grandi, sentro di bario i diferente kompanianan. Curaçao Cares ta yama tur organisashon sosial pa inskribí promé ku 31 di yanüari riba www.curadoet.com. Si bo ta un fundashon, un skol, un asosiashon, kas òf grupo di grandinan, klup di skout òf di deporte, bo por inskribí un tarea òf aktividat pa ehekutá dia 20 i 21 di mart 2015. Turorganisashon ta bini na remarke pa un aporte finansiero di maksimal Nafl. 1,100. Tin yen posibilidat, por ehémpel bo por organisá un dia di wega i entretimentu pa grandinan, bo por drecha òf fèrf kurá di skol, planta mata i berdura òf bo por reorganisá biblioteka òf kashi. Tur esakinan lo bira posibel ku yudansa di hopi boluntario. Aña pasá 32 kompania, studiantenan di skol i universidat i diferente grupo di boluntarionan a yuda realisá tur e diferente metanan. Si bo tin un grupo di boluntario bo por inskribí  entrante 1 di februari. E aña aki St.Maarten i Statia tambe ta partisipá bou di e nòmber SXM DOET i STATIA DOET. Nos ta konta ku partisipashon di hopi organisashon sosial i miles di boluntario pa duna un man na e akshon boluntario di mas grandi na Kòrsou ku lo tuma lugá dia 20 I 21 di mart e aña aki. Kontakto: Deva-Dee Siliee curadoet@curacaocares,org 514-3224