WILLEMSTAD — Aña pasa CURA DOET a konta ku un kantidat rèkort di tarea i aktividat: 184 aktividat di mas ku 156 organisashon sosial rònt Kòrsou, di banda riba te banda abou, a konta ku sosten di kasi 4000 boluntario.

Otro aña CURA DOET lo bolbe tuma lugá dia 11 I 12 di mart 2016, kual ta un siman mas promé ku e añanan anterior. Curaçao Cares ta yama tur organisashon sosial pa inskribí promé ku 22 di yanüari riba www.curadoet.com. Si bo ta un fundashon, un skol, un asosiashon, kas òf grupo di grandinan, klup di skout òf di deporte, bo por inskribí un tarea òf aktividat pa ehekutá dia 11 i 12 di mart 2016. Tur organisashon ta bini na remarke pa un aporte finansiero di maksimal Nafl. 1,100.

Tin yen posibilidat, por ehémpel bo por organisá un dia di wega i entretimentu pa grandinan, bo por drecha òf fèrf kurá di skol, planta mata i berdura òf bo por reorganisá biblioteka òf kashi. Boluntarionan di gruponan di kompania, studiantenan di skol i diferente grupo di boluntarionan por kuminsa inskribí for di 1 di yanüari pa duna un man. Ku boso sosten, lo ta dos dia tremendo atrobe!

Meskos ku añanan anterior e akshon lo tuma lugá na Kòrsou, Hulanda, Aruba, Boneiru, Statia i Sint Maarten riba mesun fechanan.

Nos ta konta ku partisipashon di hopi organisashon sosial i miles di boluntario pa duna un man na e akshon boluntario di mas grandi na Kòrsou. Ban pa un 2016 grandi i ainda mas positivo.

Kontakto: Deva-Dee Siliee curadoet@curacaocares,org 514-3224