WILLEMSTAD —  Djadumingu último e organisashon ku ta Sali na interes sosial di Haitianonan biba aki na Kòrsou, UPH ( Union des Patriotes Haitiens) a inougurá nan website nobo, kaminda mundu kompletu lo por sigui nan desaroyo aki na Kòrsou. Ta trata aki di un organisashon no gubernamental, kaminda nan ta Sali na interes di nan kompatriotanan na momentu ku esei ta nesesario, sigur den aspektonan sosial.

Komo invitado spesial na okashon di  lansamentu di e website aki tabata Chairmain di AWA Airways, Olivier Arrindell i tambe Presidente  di e hunta di direktiva Giovanni Atalita.

Ta trata aki di un  website den tres idioma, esta ingles, frances i creole, kaminda nan ta komuniká ku nan miembronan. Durante di e aktividat, e presidente di UPH a duna un splikashon di kiko nan organisashon ta hasi na Kòrsou.

Chariman di AVA Airways, papiando na idioma creole a splika esnan presentá su vishon pa ku mundu di aviashon i kiko e kier logra ku  su buelonan direkto entre Kòrsou i Haiti na un preis humano.

Presidente di hunta, Giovanni Atalita di su parti a mustra ku aña pasa nan a bai Haiti, kaminda a reuní ku outoridatnan Haitiano i tambe a sera diferente akuerdo ku asina ku AVA keda kla ku e pèrmit ekonómiko, ya mayoria kos ta na su lugá, kaminda lo bai yuda Haitianonan transportá muchu mas fásil.

Di nan banda, vários tabata esnan ku a duna nan komentario di e preokupashon ku ta eksistí, sigur pa loke ta trata e tarifa ku nan ta keda kobra pa un buelo di 1 ora i 20 minüt.

E kompania di aviashon AVA Airways tin 17 luna pendiente di su pèrmit ekonómiko, apesar di a entrega tur dokumento manera lei ta eksihí. Meskos ku tur otro kompania di aviashon establesé aki na Kòrsou, nos tambe tin derechi di haña e mes un oportunidat ku tur otro kompania ku den pasado a pidi i haña pèrmitnan nesesario.

E úniko kos ku AVA Airways ke ta yuda krea kuponan di trabou aki na Kòrsou, pasombra esei ta un dje situashonnan ku mas ta pisando den e pais aki.  AVA Airways ke pa e wòrdu atendé fair i hustu!