Pa promé biaha nan dos huntu

WILLEMSTAD:-  For di dia ku a anunsiá e ‘tour’ den òktober di Cache Royal, un di e fechanan ku sigur a hala atenshon ta dia 3 di òktober. Ta e promé toka di Cache Royal i pa promé biaha nan ta topa Claudius Phillips & OREO. Un kombinashon ku hopi hende a spera! Siman pasá a pone un kantidat limitá di 300 karchi na 55 florin den pre-benta, VIP (single) 100 florin. Karchinan ta bayendo manera pan kayente. Ta premirá ku lo kuminsá ku pre-benta regular e siman aki. Karchinan lo ta 65 florin. Kombersando ku e organisashon nan ta premirá ku lo no tin karchi na porta mirando e kombinashon “Hopi Dushi”. Ta skohe semper pa anunsiá e kombinashon i e fecha di e fiesta trempan, di e forma aki ta duna tur baidó di fiesta i fanátiko di ámbos agrupashon musikal chèns pa traha nan budgèt i spar nan sèn pa nan ta den e fiesta ku sigur lo surpasá tur espektativa.  Un kos ta sigur, no por tarda hopi pa kumpra karchi. Club Spoonz ta ofresé un kantidat eksklusivo tantu den ‘general’ komo den e área di VIP ku a bira masha popular, pa esaki por tuma kontakto ku 513.2841.  Karchinan optenibel na Beep Beep, Mensings Caminada, 24 Uur Uit De Muur i Tik Tak.

E ambiente rondó di e fiesta ta úniko; esaki mes ta hasi ku e espektativa pa e kombinashon aki ora pa ora ta kresiendo mas. Claudius Phillips & OREO awòki ku nan piesa nobo “Groovy Chopsuey” i Cache Royal ku tambe a saka e promé di ‘single’ pa e temporada “Den Skondi”. Un anochi di hit tras di hit, ‘Habri bo brasa’, ‘Midnight Train’, tur lo zona, bailamentu sin fin! Bo tin bo karchi kaba?