InselAir lo tuma e periodo usual di low season pa hasi trabou di mantenshon riba su flota anto pa finalisá e proseso di kontratashon di kapitan. Espesialmente e ekipo interinsular, e tipo di avion Fokker 50, lo wòrdu someté na algun trabounan di mantenshon y chekeonan rekerí. Esaki ta nifiká ku te ku fin di òktober InselAir lo operá su rutanan di Fokker 50, primariamente entre e islanan ABC, ku un orario ahustá.

Kontratashon y training di simuladó
E proseso di kontratashon di kapitannan pa Fokker 50, ta andando despues ku InselAir a yega na akuerdo ku Gobièrnu di Kòrsou na sèptèmber riba e rekisitonan pa piloto. InselAir ta ferwagt di tin sufisiente kapitan kla pa e flota di Fokker 50 pa fin di òktober.  Banda di e tempu ei algun di e Fokker 50-nan lo bolbe den operashon despues ku trabou di mantenshon a wòrdu finalisá. Entretantu, e pilotonan aktual di InselAir ta siguiendo nan training anual obligatorio di simuladó.

Informashon pa pasahero
“ Un orario di buelo ahustá a wòrdu kreá, prinsipalmente pa nos rutanan ABC, pa redusí e impakto riba nos pasaheronan. Mas aleu, InselAir lo pone otro tiponan di avion den operashon i lo kombiná sierto buelonan tambe”, segun Jurgen Lippinkhof, Hefe Komersial di InselAir. InselAir lo informá su pasaheronan via e datonan di kontakto ku nan a duna na momento di hasi reservashon, pero ta avisá su pasaheronan pa semper chèk e státus di nan buelo riba e wèpsait di InselAir