E fundashon ta risibí 75.000 euro

Stichting Kinderbescherming Curaçao (SKBC) ta e ganadó di e premio Helffer Kootkar Prijs 2020. Oranje Fonds ta entregá e premio di 75.000 euro kada dos aña na un organisashon ku di un forma spesial ta envolví hende den komunidat. Ta promé biaha ku ta entregá e premio na un organisashon den e parti Karibense di nos Reino.

SKBC ta komprometé pa yuda i guia muchanan, ku ta krese den un situashon di riesgo òf menasa, na tempu. Pa señalá problemanan na tempu e fundashon tin for di 2007 un telefòn pa mucha i hóben di kua e muchanan por tuma kontakto ku nan. E último añanan e kantidat di yamadanan a baha. Esaki pasombra hubentut  ta hasi mas tantu uso di internet. P’esei SKBC ta bai usa e montante di Helffer Kootkar Prijs pa desaroyá un App spesial. Ku esaki mucha i hóbennan por drenta den kontakto rápido i anónimo ku e fundashon. Ademas SKBC ke buska mas boluntario i train nan di manera ku nan por papia tokante problema i kosnan ku ta konserní nan.

Helffer Kootkar Prijs

Na 1980 señor A.H. Helffer i señora C.M.J. Kootkar a funda Stichting Helffer-Kootkar. E premio tin komo meta pa stimulá siudadania sosial.  Ta entregá esaki na persona i organisashonnan ku ta sòru pa personanan ku ta den un situashon vulnerabel partisipá den komunidat. Ámbos fundadó a fayesé kaba i for di 2007 a inkorporá e premio komo Fondo riba Nòmber den Oranje Fonds. Un hurado ku ta konsistí di e miembronan di direktiva di Stichting Helffer-Kootkar i miembronan di direktiva di Oranje Fonds ta esnan ku ta stipulá ken meresé e premio.

Tokante Oranje Fonds

Oranje Fonds ta traha riba konvivensia sosial den kua hende tei pa otro i tur hende por partisipá. P’esei nan ta mobilisá, fortalesé i sostené mas tantu persona i organisashon posibel ku ta sòru pa ningun hende ta nan so. E sosten ta konsistí di inspirashon, konseho, konosementu i sèn. E Fondo por hasi esaki danki na e.o. Postcode Loterij, Nederlandse Loterij, Amigu i empresanan. Rei Willem-Alexander i Reina Máxima ta e pareha patrosinadó di Oranje Fonds.