WILLEMSTAD – Resientemente 19 guia di turista di Kòrsou a huramentá ante e organisashon “One Curaçao” . Ta trata aki di un organisashon ku resientemente a keda ofisialmente lantá na notario, ku tin komo meta pa pone tur guia lokal papia e mes un ‘idioma’ ku turistanan ku bishita nos pais. Promé ku “One Curaçao” ya tabata bezig fo’i aña 1996 ku Shorex International pa sertifiká e guianan. E intenshon di One Curaçao ta pa sigui ku esaki i na un base regular organisá seminario, seshonnan di informashon, kaminda ta tene e guianan lokal na altura di tur desaroyo, pa na momentu ku turistanan yega nos Isla, nan haña e mihó informashonnan ku e trabou ta rekerí. Tin 7 punto di kual e 19 guianan aki a huramentá ku nan lo kumpli ku n’e na momentu ku nan lo bai hasi nan trabou ku lo mester ta ku tur honestidat i hasi e máksimo esfuerso di akuerdo ku nan habilidat ku Kòrsou ta pidi. E 7 puntonan ta:

1. Ku nan ta hura di papia únikamente e bèrdat i nada mas ku e bèrdat di Kòrsou
2. Ku nan ta hura di lo no inventá ni proveé informashon falsu di Kòrsou
3. Ku nan ta huramentá ku nan no ta papia nada negativo di Kòrsou
4. Ku nan ta huramentá ku inmediatamente nan ta denunsia esnan ku faya pas kumpli ku puntonan 1, 2 i 3
5. Ku nan ta huramentá di lo bende Kòrsou na e mihó forma di nan habilidat i na benefisio di Kòrsou
6. Ku nan ta huramentá ku periódikamente nan lo amplia nan konosementu na progreso di Kòrsou
7. Ku nan ta huramentá di lo pasa nan konosementu na e próksimo generashonnan di Kòrsou.

E 19 guianan di turista di Kòrsou ku a huramentá ta: 1 Bigala Cecilia, 2 Clarina Gomez, 3 Gabriel Persad, 4 Heddy Cijntje, 5 Jessica Gevers, 6 Judith Coffie, 7 Livette Lesire, 8 Lorraine Richardson, 9 Lucete Kwidama, 10 Maja Atalita, 11 Michaela Kuckelkor, 12 Miralva Hansen, 13 Mirella Spencer, 14 Myrea Rodriguez, 15 Nelleke van Haren, 16 Nubia Bonifacio, 17 Ramiro Schotborgh, 18 Vontina v/d Schot i 19 Yvette Eliza. E huramentashon ofisial a tuma lugá dilanti Sr. Emlyn Pietersz, miéntras ku Sra. Edmee Isidora Direktora di Atlantis Adventure, tabata e testigu na momentu ku e guianan tabata firma pa nan dokumento ofisial. Aparte di a haña un dokumento kaminda nan kada unu ta mira kiko nan a huramentá, tur e 19 guianan aki a risibí un badge ku nan nòmber ariba ku ta indiká ku nan ta un guia ku a huramentá komo Area Specific Interpreter. Próksimamente lo tin mas guia di turista na Kòrsou lo keda huramentá pa asina ei Kòrsou konta ku un mayoria di guia di turista ku sa kiko nan ta papia na momentu ku nan mester bende Kòrsou.