…CTB ta kontentu ku lasonan amistoso entre Kòrsou i turistanan korporativo…

WILLEMSTAD- 4 yüni 2013:- Resientemente Kòrsou a risibí bishita di Omar Hamilton Group; un grupo ku ta konsistí di ehekutivonan internashonal enkabesá pa Omar “The Big O” Hamilton. Durante e dianan festivo merikano, ‘Memroial Day Weekend’ e grupo a eksplorá nos isla, sera konosí ku nos kultura i asta sobra tempu pa hasi un bunita gesto na Krèsh Bai bin.

Kòrsou tabata anfitrion di Omar Hamilton Group ku sigur a keda altamente impreshoná pa e beyesa di nos isla kombiná ku nos kultura, eksperensia kulinario i arkitektura. Omar Hamilton Group a wòrdu fundá den kuminsamentu di añanan 2000 pa Omar Hamilton ku un mishon pa biaha ku un grupo di persona pa diferente destinashon pa asina sera konosí i amplia konosementu. Ademas di esaki a stipulá for di inisio di e grupo ku na final di kada biahe e grupo lo hasi un donashon sea finansiero òf di buki na un instansha òf organisashon na e pais ku nan bishitá. Omar Hamilton Group a bishitá Krèsh Bai Bin i a hasi un bunita gesto na e muchanan di e krèsh. Krèsh Bai Bin ta situá den bario di Groot Kwartier i a wòrdu fundá na aña 1965. Diariamente e krèsh ta sòru pa 150 mucha pero tin un kapasidat di 250 mucha. Semper Krèsh Bai Bin ta buska maneranan pa kubri nan eskases finansiero pues e donashon hasí dor di Omar Hamilton Group lo sòru pa duna un man pa remediá e problema aki. E kabesante di Omar Hamilton Group a ekspresá di ta sumamente kontentu ku e hospitalidat ku Kòrsou a brinda nan, ta ku plaser nan ta yuda organisashonnan di e komunidat, ademas di ta kontentu di por yuda Krèsh Bai Bin, nan a komentá ku sigur lo regresá Kòrsou. CTB ta aploudí nan inisiativa i un bes mas ta di akuerdo ku e akshonnan manera esun di Omar Hamilton Group ta frutanan di esfuersonan di tur partner den industria turístiko durante di e kampaña di konsientisashon ‘Dushi Hende’. Riba foto athuntu por haña un impreshon di e momentu di donashon dor di  Omar Hamilton Group na e lidernan di Krèsh Bai Bin.