Willemstad 12 di november  2014-  Ministerio Públiko di Kòrsou, Kuerpo Polisial di Kòrsou (KPC) i ENNIA, durante di e seminario Prevent Now organisá pa e kompania di seguro ENNIA, a firma un akuerdo di intenshon (MoA)  pa habri un Toko di Prevenshon (TdP.)  Toko di  Prevenshon ta un tienda dediká na prevenshon di e seguridat sosial.  Den futuro habitante i bishitantenan di Kòrsou por bishita e tienda aki pa haña konseho riba medionan pa prevení ku ta pas ku nan nesesidat pa seguridat.  Komo un promé akshon e Toko di Prevenshon di OM, ENNIA i Kuerpo polisial lo kuminsá ku un proyekto piloto ku tin e nòmber “Mi ta brasa seguridat.”  E proyekto piloto aki ta dirigí riba protekshon kontra di atrako i ladronisianan di outo den barionan.  ENNIA mes tin e intenshon pa lanta un Tienda di Prevenshon.  E tienda aki lo ta online i lo keda lansa durante di e promé kuartal di otro aña. Fiskal Mayo, Heiko de Jong ta bisa: “ Ministerio Públiko, ENNIA i Kuerpo Polisial di Kòrsou ta e inisiadónan di e Toko di Prevenshon pero no ta  e úniko partisipante den dje.  E Toko di Prevenshon ta un fórmula di i pa Kòrsou.  Nos ta stimulá tur otro instansha ku por kontribuí na siguridat na Kòrsou pa partisipá.  Esaki ta un inisiativa públiko partikular pero den kua kada ken ta keda mantené su responsabilidat.” Gilbert Martina, Senior Managing Director di ENNIA na su turno ta bisa: “ E Toko di Prevenshon ta un tienda di prevenshon ku algu èkstra.  Esensia di e Toko di Prevenshon ta ku e tin produktonan konkreto i servisionan ku ta yuda prevení asina evitá kalamidat.  Na di dos lugá e Toko di Prevenshon ta yuda e suidadano pa ta mihó prepará den kaso kalamidat bati na porta.  Huntu nos ta mas fuerte.  Prevenshon i seguridat ta un tarea di nos tur pa asina no alsa e kalidat di bida riba nos dushi Kòrsou.” ENNIA a organisá e seminario Prevent Now pa di dos aña konsekutivo.  Prevent Now 2014 a para den lus d prevenshon di e ambiente sosial.  Segun Gilbert Martina” Aña pasa e seminario tabata un éksito ku partisipashon di 500 partisipante.  E aña aki e alrededor di 650 partisipante, ku a inskribí, a demonstrá ku seguridat ta haltu riba nos agènda.  ENNIA ta kombibí ku bienestar di nos komunidat.  Prevenshon banda di siguridat ta kontribuí na bienestar di nos tur.