esta promé ku pandemia

WILLEMSTAD- 11 di novèmber 2021 – Ofisina di Turismo di Kòrsou (CTB) ta raportá un kantidat di 35.020 turista di estadia pa luna di òktober. Ku e kantidat di turista di estadia aki, luna di òktober 2021 a yega na 101% di e kantidat registrá na òktober 2019 esta promé ku pandemia. Na òktober 2019 un total di 34.526 turista di estadia a bishitá Kòrsou. Ta promé biaha desde ku a kita e restrikshonnan di biahe, ku nos a surpasá e kantidat di turista ora kompará esaki ku e mesun luna. Kòrsou a bolbe registrá un kantidat rèkòrt di turista for di Hulanda, un total di 22.713 turista hulandes a keda risibí na òktober 2021. Pa di kuater luna konsekutivo e kantidat di turista risibí for di Hulanda na 2021 a surpasá e kantidat di turista hulandes risibí den e mesun luna na 2019.

Na òktober, un kantidat di 25.933 turista di estadia a bishitá Kòrsou for di Europa. For di Hulanda nos a risibí 22.713 turista, 1.365 for di Alemania i 646 for di Bèlgika. Informashon kompilá for di e karchinan di imigrashon ta mustra ku turistanan europeo a keda un averahe di 10.7 anochi na luna di òktober 2021. Miéntras na òktober 2019 e averahe di anochi tabata 8.9. For di Estádos Unídos un kantidat di 3.379 turista a bishitá Kòrsou na luna di òktober. E turistanan aki a keda un averahe di 6.8 anochi miéntras e mesun luna na 2019 turistanan prosedente di Estádos Unídos a keda 6.1 anochi. For di region di Sur Amérika un total di 3.050 turista di estadia a bishitá Kòrsou, 49% tabata prosedente di Colombia miéntras 25% tabata prosedente di Brazil. For di Karibe un total di 1.428 turista di estadia a keda risibí na òktober. Mayoria di e turistanan aki ta prosedente di e paisnan den Reino Hulandes.

Na luna di òktober un total di 8 barku krusero a bishitá nos pais ku un total di 12.605 turista krusero.

“E prestashon di luna di òktober ta demostrá kon resiliente nos industria di turismo ta. Ku 35 mil turista di estadia na luna di òktober nos por anunsiá ku orguyo ku nos industria di turismo ta na mesun nivel ku òktober 2019. E esfuerso kolektivo di stakeholders lokal huntu ku nos partnernan internashonal den nos merkadonan prinsipal a sòru pa luna di òktober tabata eksitoso. Banda di esaki, Kòrsou a risibí un kantidat total di 185.265 turista di estadia durante e promé 10 lunanan di aña 2021”, asina CTB a remarká.