WILLEMSTAD- 3 di sèptèmber 2021 – Dia 18 di sèptèmber próksimo ta World Cleanup Day 2021. Kòrsou tambe ta forma parti na e akshon di limpiesa mundial aki bou di guia di Curaçao Clean Up pa asina logra un pais mas limpi. Un Kòrsou limpi ta loke Ofisina di Turismo di Kòrsou (CTB) tambe ta para pe. Tantu pa nos mes komo habitante di e dushi pais aki pero tambe pa nos bishitantenan for di eksterior ku ta bin pa eksperensiá nos pais.

E aspekto di limpiesa di nos pais ta forma parti di e totalidat di e produkto turístiko ku nos ta brinda na kada unu ku skohe pa bishitá nos pais. P’esei komo CTB nos kier stimulá nos komunidat pa forma bo grupo i partisipá na e akshon di limpiesa grandi aki riba dia 18 di sèptèmber próksimo. Ademas durante e siman den kual World Cleanup Day ta tuma lugá, CTB lo lansa un kampaña di konsientisashon pa sigui sostené e kousa aki pa huntu nos logra un Kòrsou limpi pa nos mes i pa nos turistanan. Pa partisipá na e akshon di limpiesa kordiná pa Curaçao Clean Up dia 18 di sèptèmber próksimo, subi www.worldcleanupdaycuracao.org òf pa kualke informashon adishonal tuma kontakto via worldcleanupdaycuracao@gmail.com

Ban pa un Kòrsou, dushi i limpi. Huntu nos por!