WILLEMSTAD-Mei 2013:- Aña pasá Ofisina di Turismo di Kòrsou a lansa su kampaña di konsientisashon ‘Dushi Hende’, ku ta karga e meta prinsipal pa konsientisá nos hendenan di e importansia di nos komportashon pa ku nos mes i pa ku e turista atraves di e 6 balornan básiko kual ta: servisio, hospitalidat/amabilidat, responsabilidat, orguyo, integridat i honestidat. Pa por sigui kompartí e mensahe di ‘Dushi Hende’, CTB a lansa un programa di training espesialmente dirigí riba e personanan ku ta traha direktamente ku e turista. E promé gruponan ku a partisipá na e training aki ta  Shop Attendants i Car Rental Agents.

Durante di e training fasilitá pa Experientia, e 36 partisipantenan a partisipá den diferente tarea basá riba e balornan di ‘Dushi Hende’. Pa ámbos grupo ta hopi importante pa kontinuá ku e desaroyo riba tereno di trato. E motibu pa esaki ta paso e trato ku e turista ta risibí serka e gruponan aki ta determiná kon e turista ta eksperensiá sobrá di su bishita riba nos pais. E meta prinsipal di e tareanan ku a wòrdu duná durante e training tabata pa laga e partisipantenan hinka nan mes den sapatu di e kliente i asina evaluá ki tipo di servisio e kliente ta risibí. Ku e konosementu risibí durante e training e partisipantenan ta bira mas konsiente di kon nan mes ta duna servisio i asina por drecha kaminda ta nesesario.

E siguiente gruponan ku tambe lo risibí e training aki den simannan benidero ta di sektornan di hotèl, restorant, apartamentu, polis i trahadónan di fèri. E 36 partisipantenan ku a terminá e promé edishon di ‘Dushi Hende’ training a risibí nan sertifikado for di man di direktor di Ofisina di Turismo di Kòrsou Sr. Ghatim Kabbara kende a klousurá bisando “Hopi isla den Karibe ta usa un lema pa asina identifiká nan mes, den nos kaso nos ke demostrá na nos bishitantenan ku nos ta realmente ‘Dushi Hende’. Esei nos por logra solamente si nos apliká e balornan básiko no solamente na trabou pero tambe den seno familiar i sosial”. Ofisina di Turismo di Kòrsou ta sigui enkurashá pueblo di Kòrsou pa ban sigui plama e mensahe ku “Ta Dushi pa ta Dushi Hende”! Pa tur esnan ku ta aktivo riba Facebook kòrda ‘like’ e página di Facebook di Dushi Hende.