1.4 miyon florin den prome mita di 2016 for di barconan cu ta hancra den nos awanan teritorial

Minister Otmar Oduber dialuna mainta durante rueda di prensa semanal di Gobierno di Aruba a comparti varios informacion positivo pa nos comunidad. Banda di e cifranan positivo di turismo di Aruba e Minister cu tin e responsabilidad tambe di e cartera di transporte a duna un ‘update’ di e entrada general di e barconan cu a hancra den nos awanan teritorial. Cifranan hopi positivo pa locual ta trata e prome 6 lunanan. Minister Oduber ta indica cu alrededor di 5 aña pasa a inicia trayectonan conhuntamente cu Hulanda pa por identifica formanan pa por diversifica economia.  Den e proceso aki a identifica cu den nos awanan teritorial tin posibilidadnan hopi grandi cu Aruba mester explora. Tin a corto plaso y otronan a plaso mas largo pero cu sigur ta hopi beneficioso pa economia di nos isla. E mandatario ta elabora cu un di e opcionnan mas popular y cu mas rapido a mira un diferencia ta e cambionan di ley cu a tuma luga pa Aruba por cobra e barconan cu ta hancra den nos awanan teritorial. Hopi biaha e barconan aki ta hancra pa por ehempel mantencion, of tin cu ta eherce un of otro tipo negoshi tur esaki den nos awanan teritorial. E minister encarga cu transporte di nos isla ta splica cu hopi di e actividadnan aki yama entre otro ‘Transshipment’ tabata tuma luga cu poco vigilancia. “Cu e poco control of pa mi no mester bisa sin control algun cu ta crea un menasa directo pa loke ta nos industria turistico y naturalesa, cu si algo a bay robes e lo por a spula y daña nos beachnan cu tur e consecuencianan. Danki Dios esey no a sosode.” Sr. Oduber ta bisa.

Awor ta asina leu y basa riba hopi estudio haci, cu Aruba lo por genera fondonan for di e industria aki unda sigur lo por tin mas control tambe riba tur e actividadnan cu ta tuma luga den nos awanan teritorial. “Aruba awor ta beneficia economicamente di un industria cu pa hopi aña nos no a beneficia di dje. Mi ta masha contento di por menciona cu pa e prome 6 lunanan di aña 2016, a cobra 2,332 barconan cu a hancra den nos awanan teritorial y esaki ta 21 porciento mas halto cu aña 2015.”Ta trata aki di un averahe di 389 barco pa luna cu ta un 13 barco pa dia cu ta genera fondo adicional pa Aruba. “Esaki contrario na e pensamento cu tabata tin na momento cu a trece legislacion pa cobra cu e barconan lo no hancra mas den nos area pero lo bay for di Aruba.”  Pa e prome mita di aña 2016 esaki a genera un suma di 1.4 miyon florin pa caha di Gobierno. Minister Oduber ta comparti cu e ta surpasa e cifranan cu a premira y tin tur indicacion cu lo cera aña 2016 cu 3 miyon florin genera di e industria aki. Adicional Minister Oduber a comenta cu no a mercadea e posibilidad aki mes ainda, pues te cu awor ta trata di barconan cu ta scoge e opcion di hancra na Aruba riba nan mes. Directie Scheepvaart tin tur intencion pa inicia cu mercadeo di e opcion aki dentro di poco.

Awor no solamente Aruba por gosa di un entrada adicional pero ta bin acerca e aspecto di siguridad tambe cu awor ta un colaboracion entre otro di Havenmeester, Directie Scheepvaart y Kustwacht. “Tin hopi miho control y regulacion di tur cu ta colabora pa siguridad riba nos awanan, pa evita cualkier tipo di consecuencianan negativo den futuro.” Minister Oduber a termina felicitando henter e ekipo di Directie Scheepvaart y tur cu a colabora pa e logro positivo aki.