ORANJESTAD, Aruba – Maart 2019: Aruba Hotel & Tourism Association (AHATA) a ricibi e cifranan di ocupacion y prijs di hotelnan pa luna di Februari 2019 y CEO Tisa LaSorte a anuncia e resultado. E temporada “High Season” di Aruba ta sigi druk, aunke cu ocupacion a baha un tiki compara cu aña pasa. Na luna di Februari 2018 Aruba a experiencia un porcentahe averahe di ocupacion di 92% y na Februari 2019 e hotelnan tabata 91.8% ocupa.  

E balor averahe di cada camber a subi, similar cu na Januari: ADR (Average Daily Rate), a subi cu 7.5% compara cu Januari aña pasa pa yega $359.81. E RevPAR, cu ta e entrada averahe pa tur camber disponibel, na Februari 2019 tabata $330.30 y esaki ta un aumento di 7.3% compara cu aña pasa.

E demanda pa Aruba ainda ta halto durante e prome lunanan di 2019 y hopi hotel den region Caribe ainda ta cera despues di horcannan di September 2017. Tisa LaSorte ta indica cu pa ultimo mita di 2019 mayoria di e hotelnan den region lo a habri bek cu cambernan renoba y cu mercadeo agresivo, un realidad cu nos mester ta prepara p’e na Aruba.

E cifranan di AHATA  ta basa  riba 17 hotel:  Amsterdam Manor Beach Resort, Barcelo Aruba, Boardwalk  Hotel, Brickell Bay Beach Club, Bucuti & Tara Beach Resort, Divi & Tamarijn All-Inclusive, Eagle Aruba Resort (anteriormente Tropicana), Holiday Inn Resort Aruba, Hyatt Regency  Aruba,  Manchebo Beach Resort,  Marriott Aruba &  Stellaris Casino, The Mill  Resort, Renaissance Aruba  Resort, The Ritz-Carlton,  RIU Palace, RIU Antillas y Talk of the Town  Hotel.