ORANJESTAD, Aruba – 11 di Februari 2020: Aruba Hotel & Tourism Association (AHATA) ta acumula e cifranan di ocupacion y prijs di hotelnan tur luna, y pa luna di Januari 2020 e CEO di AHATA Tisa LaSorte a anuncia cu e ocupacion a baha.

Desde e horcannan den region Caribense di September 2017 Aruba a experiencia crecemento consistente den demanda y ocupacion. Pa motibo di e extra demanda pa nos isla, e prijsnan tambe por a aumenta den ultimo tempo. Pero 2019 a resulta un aña positivo pa nos turismo. Den e ultimo lunanan por a ripara cu e demanda a cuminsa nivela, y awor na Januari ta mira e ocupacion a reduci.

JANUARI 2020

Ocupacion: E ocupacion na hotelnan a baha cu 5.3 punto compara cu Januari 2019, yegando 83.4%. Dos hotel so a experiencia crecemento den ocupacion.

ADR: E balor averahe di cada camber (ADR) den Januari a crece cu 3.4% compara cu un aña pasa, yegando $367.67. Por nota cu prijsnan ta normalisando.

RevPAR: E entrada averahe pa tur camber disponibel, na Januari tabata $306.61, un reduccion di 2.7% compara cu un aña pasa.

E cifranan di AHATA ta basa riba 18 hotel miembro: Amsterdam Manor Beach Resort, Barceló Aruba, Boardwalk Boutique Hotel, Brickell Bay Beach Club, Bucuti & Tara Beach Resort, Courtyard by Marriott Resort, Divi & Tamarijn All-Inclusive, Eagle Aruba Resort, Holiday Inn Resort Aruba, Hyatt Regency Aruba, Hyatt Place Aruba Airport, Manchebo Beach Resort, Marriott Aruba & Stellaris Casino, Renaissance Aruba Resort, The Ritz-Carlton Aruba, RIU Palace Aruba, RIU Palace Antillas y Talk of the Town Hotel.