Fons Simon, CEO di Banco di Caribe:Banco di Caribe preparando pa un era nobo ta reforsá su tim…

WILLEMSTAD:- Banco di Caribe ta introdusí sra. Almerina da Silva Costa – Rodrigues d’Aguiar komo nan Assistant Managing Director nobo. E lo asistí e tim di maneho i tur aktividat komersial di Banco di Caribe, den tur 4 merkado. Sra. da Silva Costa no ta deskonosí den mundu bankario, previo Banco di Caribe ya kaba e’la sá di okupá diferente funshon i ta trese kuné 20 aña di eksperensia i vasto konosementu den produktonan bankario. Di akuerdo ku CEO di Banco di Caribe Fons Simon, “Almerina su eksperensia den merkado sigur lo aportá na e trayekto nobo ku nos a deliniá pa Banco di Caribe. E meta durante di mas ku 40 aña di eksistensia, semper tabata pa ofresé un aserkamentu diferente. Nos ta kere den ‘personal banking’. Tur kliente ta diferente; ta p’esei nos na Banco di Caribe no tin un aserkamentu uniforme sino unu personalisá i ahustá na nesesidat di kada kliente. Nos ta kere ku den esaki Almerina  sigur lo reforsá nos. ”

Sra. da Silva Costa komo Assistant Managing Director  ta mira su funshon na Banco di Caribe komo un reto nobo,”Kambio semper mester ta pa mihó; mi ta kontentu kon e famia nobo aki a risibí mi.  Loke semper a hasi Banco di Caribe diferente ta su toke personal i aserkamentu na kliente. Awor ku nos ta renobando i hasiendo un transishon pa un era nobo, mi ta mira mi funshon nobo ku mashá optimismo i ta determiná pa sostené mi koleganan den nos idealnan pa hiba Banco di Caribe na un próksimo nivel”.