Despues ku djabièrnè 23 di mart último un gran públiko a disfrutá di un tremendo partido entre nos selekshon nashonal i e selekshon di Bolivia, tur kos ta kla pa nos bolbe topa Bolivia, mañan durante nos segundo enkuentro amistoso. Durante nos promé enkuentro, Gino van Kessel a anotá e gol di nos selekshon i mas despues e partido a empatá ku un outogol di Darryl Lachman pa finalisá ku e skor di 1-1.
Aparte di e bon futbòl ku un i tur por a disfrutá di dje, ta tin un bunita show kultural na enkargo di grupo Forklor Ambiente Kultural (F.A.K.) na komienso i durante pousa di e partido, miéntras DJ Stevie a sòru pa un bon ambiente den stadion i Shariëlle Lodovica a interpretá nos himno na un manera úniko!
Un danki ta bai na henter pueblo di Kòrsou pa gran sosten ku nan a brinda na nos selekshon durante e promé partido i nos ta spera di por sigui konta ku boso sosten i apoyo mañan, 26 di mart, durante nos segundo enkuentro kontra Bolivia.
Durante wikènt tras di lomba nos selekshon ta tin diferente seshon di training pa sigui ke preparashon nan pa e partido di mañan pa duna un bon bataya i sigui saka kara di nos dushi isla! Pues mañan djaluna, 26 di mart un tabla lo bula den Stadion Ergilio Hato pa 8’or di anochi! Karchi nan pa e segundo enkuentro di mañan 26 di mart, lo ta optenibel mañan solamente na FFK i for di 4’or di atardi tur karchi lo ta optenibel na e lokèt nan di SDK.
E preisnan pa e diferente paketenan pa sekshonnan ta lo siguiente:
- VIP ta kosta Fl.150,- (inkluso konsumo);
- Bou di tribunanan kubrí ta Fl.30,-
- Tribunanan no kubrí ta Fl.20,-
- Mucha te ku 12 aña ku 60+ ta paga Fl.10,- den sekshon general
Kòrda ku portanan ta habri for di 5’or di atardi…yega trempan pa evitá e tráfiko! Nos a kaba di risibí un kolekshon nobo di e suèternan original di marka Nike, optenibel na kolo blanku i blou na balor di Fl.75,-. Tambe nos a sobra e famoso shalnan di nos selekshon na balor di Fl.25,-. Ámbos optenibel na FFK bou di ora di ofisina i mañan, 26 di mart, na e lokèt na di SDK promé ku e wega.
Pasa buska di bo pa asina bo bin sostené i apoya nos hungadónan. Karchinan ta bayendo manera pan kayente! Hasi lihé kumpra di bo pa bo no lamentá despues! Bin animá nos muchanan i forma e ola di ambiente ora abo komo e number 12, sostené nos selekshon nashonal, e kampion nan di e Scotiabank Caribbean Cup 2017! Nos ta topa mañan, djaluna 26 di mart, den stadion Ergilio Hato, 8or di anochi!