DEN STADION ERGILIO HATO KU PRESENSIA DI PÚBLIKO!
FFK ta hopi kontentu ku por risibí públiko bèk den stadion pa preseniá e wega di nos selekshon nashonal kontra Guatemala di djamars binidero. Naturalmente mester tene kuenta ku e siguiente reglanan stipulá pa Gobièrnu en konekshon ku Covid-19.
- Por atmití 5000 hende.
- Pa asistí na wega e bishitante mester ta kompletamente bakuná (2 bes) i e di 2 bakuna mester a wòrdu hasí por lo menos 14 dia promé ku dia 8 di yüni 2021. Pa e bishitante ku no ta bakuná, ta pidi pa trese resultado di e tèst di antigen no mas bieu ku 24 ora promé ku e wega. Esaki tambe ta konta pa mucha di 14 aña bai ariba ya komo no por bakuná mucha ainda. E bishitante mester presentá na wega ku su sédula i su karchi di bakunashon òf resultado di e tèst di antigen.
- E bia aki lo tin 2 sekshon so. VIP ta kosta fl.175,- miéntras sekshon general ta fl.40,- pa tur hende.
- Lo no bende karchi na stadion ni na puntonan di benta kustumbrá. Karchinan lo ta optenibel solamente na ofisina di FFK riba djabièrnè 4 di yüni kuminsando for di 5’or te 8’or di anochi. Riba djasabra ku djadumingu e benta lo ta di 9’or di mainta te 9’or di anochi. Si sobra karchi, lo sigui bende riba djaluna ku djamars bou di ora di ofisina.
- Por ‘swipe’ pero ta aseptá kèsh tambe.
- FFK ta hasi un súplika na tur ku ta kumpra karchi pa stashoná outo pafó di kurá di FFK i kana bin paden.
- Por kumpra karchi via e-mail; marketing@ffk.cw di kual ora hasi e pago i manda un komprobante di pago, por reservá bo karchi. Lo por trese e karchinan te na bo kas na kompra di 5 karchi òf mas ku un mínimo di fl.175,-.
- Tur karchi lo tin un parti ku e bishitante tin ku yena su nòmber, number di telefòn, adrès i -email. Sin esaki yená, no por drenta stadion. E informashon aki ta pa registrá tur bishitante ku asistí na wega.
- Uso di tapaboka ta obligatorio for di entrada di e Stadion Ergilio Hato pues for di e área di parkeo i tur momentu den Stadion Ergilio Hato.
- Pa kumpra konsumo den stadion lo bai tin bendedónan ambulante ku lo pasa den públiko ku garoshi. Lo no tin bar ni kushina na un lugá spesífiko.
- Mester mantené distansia fisíko di 2 meter na tur momentu durante e evento pues ora ta hasi uso di baño i/o kumpra konsumo tambe.
- Mester sigui instrukshon di outoridat, esta di Polis, VKC, Seguridat, Rode Kruis i ‘Crowd Managers’ na tur momentu.
- Ora wega kaba, no ta pèrmití aglomerashon na niun parti di stadion ni riba e área di stashoná outo.
FFK ta pidi koperashon di pueblo di Kòrsou pa ku e evento aki kual ta un evento piloto pa otro proyektonan, spesialmente pa dia 15 di yüni kual ta fecha di e próksimo enkuentro di nos selekshon nashonal di futbòl.