WILLEMSTAD — Djadumingu próksimo 7 di oktober,  lo tuma lugá e gran konsierto Nos Rais Musikal, ku AMAK ta ofresé pueblo di Kòrsou i su miembronan pa selebrá 50 aña di eksistensia.

Direktiva di AMAK ta sumamente agradesido na tur e artistanan di Kòrsou i den e kaso aki tambe di Aruba,  ku a koperá den un forma grandioso ku e Festival.

Direktiva di AMAK ke aksentuá ku tur miembro ku tin nan karnèt bálido por bini ku nan partner,  pa presensiá e magno evento aki. Ensayonan a tuma lugá den gran forma i aparte di e agrupashonnan musikal manera Tipiko Pasa Bon, Orkesta Vega i Arnel i Orkesta, AMAK k’e gradesi tur e kantantenan manera Gibi Doran, Urvin Yano, Melania van der Veen, Kenneth Hooi, Pastor Raul, Henry B, Wendy Jane, i e hoben kantantenan di Junior Allstar, kendenan ta bai interpretá un repertorio di 30 número di añanan 40 pa 70.

Despues di e parti di e musika di antes, e  segunda parte di e konsierto lo tin presentashon di Clinton Hato, Gems, Dibo Doran, Djaido i hinter e front di Buleria. Tur e kantantenan aki lo keda a kompaña pa Julior  All Star Orchestra bou di direkshon di Gedeon Chandler.

E chery riba e bolo ta na momento ku Gustavo Semeler di Profesional Fire Works, los e vurwerk, na momento ku Irvin Yano kanta e tumba di e aña aki, Sendé Sendé.

Direktiva di AMAK ta gradesi medionan di prensa en general pa nan sostén den promshon di e Festival, un danki spesial na Radio MAS i Tele Curacao i tambe un danki masha spesial na e patronisadornan ku ta Prins Bernhard Cultuur  Fonds, ACU, CTB, UTS ,Massive Productions i The Trader ku a hasi e proyekto aki bira un realidat.