Manera ya ta konosí nos Miss Kòrsou 2015, Kanisha Sluis, a hasi su promé aparishon internashonal kual tabata na e prestigioso sertámen Miss USA 2015. Esaki a tuma lugá ayera na River Center Baton Rouge na unda Kanisha tabata invitado spesial. Miss USA 2015 a resultá Miss Oklahoma USA: Olivia Jordan. Kanisha a lusi riba e anochi final di Miss USA 2015 un trahe espektakular di un di nos patrosinadornan internashonal ku ta Mac Duggal i mester bisa ku esaki a hasi un impakto enorme riba presentenan. Durante e biahe aki Kanisha a topa ku e diferente pèrsonanan klave di e organisashon di Miss Universo i tambe varios selebridat manera entre otro Miss USA 2014: Nia Sanchez, Miss Universe 2014: Paulina Vega, Lu Sierra: Official Catwalk Coach di Miss Universe, Leila Lopes: Miss Universe 2011, Miss USA 2013: Erin Brady, Paula Shugart (presidente di e organisashon di Miss universe), Miss World America 2015: Victoria Mendoza, Mac Duggal i Jovani di Jovani Fashions. Aparte di ku Kanisha a bai pa e sertámen di Miss USA, tambe ela forma parti di un Fashion Show di un diseñador mashá konosí, Jovani Fashions. Coridja Stars Productions ta sumamente orguyoso ku e oportunidat aki brindá na Kanisha i alabes ke gradesí pa e sostén risibí di Curaçao Tourism Board, Curaçao Airport Holding i Inselair, Padrino Couture, Tola’s Fashion i Caprichos de Mujer ku a sòru pa Kòrsou ta prepará pa e invitashon spesial aki.