WILLEMSTAD.- Nos a drenta e siman di ‘Neon Vibe Premium Parade’, e jump-up ku tei dominá kaya djasabra awor, 8 di febrüari 2014. Tur kos ta kla pa Grupo di Karnaval ‘Premium’ presentá ‘Neon Vibe Premium Parade’, e berdadero vibrashon di alegria den ambiente kolorido di ‘neon’. Gio Fuertisimo, Dreams i Tune ta pendiente pa bai dominá kaya djasabra awó ku nan músika i ku presentashon di e reinan di Kaya.

REI DI KAYA

E jumpup aki lo dunabu e oportunidat úniko di baila riba animashon di e kantantenan mas kotisá den temporada di Karnaval. Imaginábu ta jump i Hunneley Felicia, Amos Balentien, Paul Welvaart, Dju Dju V, Luwi Jano, Igmar Lareine, Tico  Libiee, Dibo Doran, Lele Gonzalez i Richi Rich ta basha pa bo gosa!. Na final dje anochi lo tin un solo ‘Rei di Kaya’, ken lo e ta? Tur trámite ya a ser hasi pa dje forma ei garantisá tremendo ambiente durante di e jump-up. E organisashon te hasta a skohe e ruta di jump-up mas gusta. E jump-up lo sali for di Rijkseenheid Boulevard na altura di kantor di Duana, Schottegatweg Zuid, Schottegatweg Oost, pasa Promenade, Zuikertuintje, Rooi Catochi, Biesheuvel i bai terminá bek riba Rijkseenheid Boulevard na altura di Hòfi Biesheuvel.

KARCHI

Partisipashon na ‘Neon Vibe Premium Parade’ ta kosta solamente 45 florin i ta inkluí bo T-shirt, animashon musikal di Gio, Dreams i Tune i un pakete di konsumo. Karchi ta na benta na Beep Beep Rio, Servei, Mensing’s Caminada i serka tur miembro di Grupo Premium. Lo repartí T-shirt riba djabièrnè, 7 di febrüari di 3’or pa 7’or i djasabra 8 di febrüari di 11’or mainta pa 5’or di atardi na Because Entertainment Center. Riba e dianan di entrega lo tin benta di diferente asesorio manera brel, renchi, kadena etcetera pa bo keda tur iluminá. Kòrsou, preparábu pa un tremendo jump-up ku partisipashon di e tres bandanan mas grandi pa loke ta trata temporada di Karnaval. Bin jump i sostené nos gruponan di Karnaval. Buska bo karchi tempran pa bo no keda afó!.