Ku alegria i gran orguyo organisashon di Curacao North Sea Jazz Festival ta anunsiá nòmbernan nobo pa e di 7 edishon, ku ta tuma lugá riba 1, 2 i 3 di sèptèmber. Grandinan manera Tom Jones, Jamie Cullum, Level 42, Branford Marsalis & Kurt Elling i Melody Gardot lo tei riba nos isla riba djabièrnè. Pa djasabra nos tin te ainda Michael Bolton i Snarky Puppy.
Speshal pa e festival aki, produktor Sergio George a forma Our Cuban Affair. Un proyekto úniko pa por brinda e públiko lo mehor di músika Kubano. Ku Havana D’Primera di Alexander Abreu komo base, i lo tin un elenko di kantante manera: Aymee Nuviola, Isaac Delgado, Paulito FG i tambe e vokalistanan di Los Van Van. Un konsierto históriko pa kuminsá nos festival riba stage Sam Cooke djabièrnè anochi.
E organisashon ta trahando duru riba otro nòmbernan di diferente artista. Nos lo anunsiá esakinan den lunanan ku ta bini.
Sir Tom Jones ta un leyenda bibu: e kantante di Wales tin un karera di mas di 50 aña i tin vários éksito riba su nòmber. E la presentá klásikonan manera It’s Not Unusual, Delilah, What’s New Pussycat, Kissand Sex Bomb, último añanan e ta coach talentonan hóben den The Voice UK i aña pasá a saka su promé biografia, Over The Top And Back, i tambe su disko mas resien Long Lost Suitcase.
Michael Bolton ganadó di varios Grammy Award, kantante i kompositor internashonal ku a bende mas ku 60 mión disko mundialmente. E ta nominá 4 biaha pa Grammy komo mihó kantante maskulino di POP i e la gana esaki dos biaha. Tambe e la gana 6 American Music Awards, i ta resipiente di un strea Hollywood Walk of Fame. Komo kompositor e la haña 24 BMI & ASCAP Awards, inkluyendo Songwriter of the Year, 9 Million-Air awards, i the Hitmakers Award di Songwriters Hall of Fame. Te fecha di awe, Michael Bolton a logra ku 8 disko di dje a yega den Top Dies i 9 single na puesto number 1. E la komponé pa entre otro: Cher, Barbara Streisand, KISS, Jay Z & Kanye West. E la graba i aktua ku leyendanan manera Ray Charles, BB King i Luciano Pavarotti. Tambe e la komponé ku íkononan di Bob Dylan te Lady Gaga. E ta resipiente di Martin Luther King, Lewis Hine, i Muhammed Ali Humanitarian Awards, i e la funda the Michael Bolton Charities for women & children at risk, awor aki den su di 24 aña.
Jamie Cullum ta un outoridat riba tereno di jazz i un figura prominente den mundu musikal. E ta areglista, produktor, e ta enbolbí den pelíkula i dokumental, e tin su propio programa di radio na BBC i klaro e ta un kantante ganador di Grammy, pianista i kompositor. Su disko mas resien ta Interlude di aña 2014.
Den dékada ’80 Level 42 a skor éksito tras di éksito ku piesanan manera Running In The Family,Something About You i Lessons In Love. E banda Britániko, forma rondo di e kantante i basista Mark King ta drei entre otro rondó di e manera fuerte i lihé ku Mark ta toka bas. Despues ku nan a splet pa algun aña, for di 2001 nan ta ‘tour’ rònt mundu atrobe.
Saksofonista Branford Marsalis ya ta di bishita serka nos aki na Kòrsou, kaminda e la aktua ku su propio banda i ku e superstrea Sting. Marsalis a haña eksperensha den bandanan di entre, Art Blakey i Lionel Hampton, e ta direktor di e houseband di The Tonight Show i e la hasi gira den e proyekto Buckshot LeFonque. E biaha aki no solamente e ta bin ku su propio kuarteto, pero tambe e ta bin ku e kantante Kurt Elling, ku ta konosí pa su alkanse di 4 oktaf, su téknika di kanta perfekto i su manera emoshonal di interpretá piesanan bunita.
Melody Gardot a deskubrí piano na edat relativamente hóben i a eksperenshá despues di un aksidente serio, ku músika por ta terapia. E la siña toka guitara i komponé riba su mes i a produsí 4 disko te awor.E mas resiente ta Currency Of Man di aña 2015.
Snarky Puppy ta toka fusionjazz instrumental manera e mester ta. E kolektividat tin un formashon di 40 miembro ku ta kambia kada biaha i ta eksperimentá ku diferente estilo. Anteriormente e aña aki nan a risibí un Grammy pa nan disko Sylva ku Orkesta Metropole.