Djamars dia 18 di novèmber na waf Mathey na Otrobanda

WILLEMSTAD – Djamars awor entre 8 pa 10 or di anochi lo presentá un programa interesante di Freewinds Band ku komo artistanan lokal invitá e kantante Noisette Varlack i e guitarista Raymond Meit. Manera semper Freewinds Band ta bou di guia di guitarista Patrick Zagury ku awor mester kompartí e papel di solista ku Ray Meit ku tambe sa ta kon. Esaki ta e programa musikal ku staf di e barku krusero Freewinds a prepará den koperashon ku Curaçao Jazz Foundation (CJF). Pa prèt Noisette Varlack na edat di 9 aña a partisipá na un playback show na Breda na Hulanda, kaminda e tempu aya e tabata biba ku su mayornan – i el a gana! Tres aña despues e famia a muda pa Kòrsou kaminda el a partisipá na un festival di kanto di Markwell i su Estrea – i el a gana esei tambe! Ku su 16 aña el a partisipá na e Wantomba yu di Kòrsou, kaminda pa promé biaha a meskla jazz ku seú, i el a resultá na di tres lugá. Na 2003 den un kòntèst pa deskubrí talento nobo el a alkansá e di kuater puesto. Ora el a partisipá na CuraStar na 2005 el a finalisá na di 4 lugá. Dos aña despues e tabata kanta soul ku Identity Band. Djamars awor e ta laga Freewinds Band kompañ’é. Na edat hóben ya Raymond Meit tabata toka blues i rock riba guitara. Ku primunan el a lanta Bloo Cheaz promé ku nan a forma e banda 18Karat ku kua nan a toka frekuentemente. Su inspirashon e ta haña di artistanan grandi di rock manera Carlos Santana, Led Zeppelin, Deep Purple, Jimi Hendrix, Yes, Van Halen i Pink Floyd. E ta un guitarista fiho na presentashonnan insidental di e bandanan Common Ground i Survival. Komo tal por spera ku djamars awor tambe lo e desviá bai den direkshon di rock i blues. E konsierto ta kuminsá djamars 8 di anochi. For di mitar di 8 ta bende karchi di entrada na rason di 15 florin pa persona na trapi di e bapor na un di e wafnan na Otrobanda. Gran mayoria di e fondonan ku lo rekoudá ku e konsierto aki ta bai pa Fundashon Kas di Palu di Maishi, ku ta manehá i konservá un kasita asina na Dokterstuin.