Saka potrèt ku Papa Pasku i su ayudantenan!

WILLEMSTAD –  Bo ta kuminsa sinti fin di aña di bèrdè mes, ora ku tin nochi di kompra! Djaweps awor dia 29 di novèmber ta e promé nochi di kompra di e temporada aki! Manera ya por a tuma nota, Renaissance Mall & Rif Fort su dekorashon di fin di aña tambe tei i ta kompletá e dianan di fiesta na Kòrsou.  Anualmente Renaissance Mall & Rif Fort ta dekorá i ta ofresé e kliente un ambiente relahante i festivo pa nan paseo di kompra. Establesimentunan lo ta habri te ku 9’or di anochi tur djaweps i lo tin entretenimentu bibu kuminsando for di 8’or di anochi.

Saka potrèt ku Papa Pasku i su ayudantenan, probechá di un anochi den ambiente familiar saka potrèt di e diferente dekorashonnan ku e aña aki un biaha mas ta sentro di atenshon. No lubidá di ‘tag’ Renaissance Mall & Rifort riba Facebook! Tambe a pèrkurá pa diferente ‘skina’ di dekorashon na unda fásilmente por saka potrètnan bunita komo rekuerdo di e fin di aña aki. Tuma nota di e siguiente fechanan; e nochinan di kompra ta sigui riba djaweps dianan 6, 13, 20 i 27 di desèmber próksimo. No lubidá ku Renaissance Resort ta ofresé WiFi i parkeo grátis pa tur kliente.