Spesialmente den tempunan difísil ta importante pa ekspandé nos netwerk i krea oportunidatnan nobo. Network After Work ta ofresé un manera plasentero pa haña kliente, business partners, empleado, profeshonalnan i pa konektá ku empresarionan.

Na e di tres edishon di Network After Work, Mr. Billy Jonckheer, presidente di Kamer Van Koophandel, lo duna un speech pa inspirá e públiko i amplia nan perspektiva.

Den e segmento “Meet My Business”, e donjo di AMG Media, Clayton Lanoy, lo kompartí su eksperensia komo empresario i kiko ta loke ta hasi su graphic studio resaltá.

E di tres edishon di Network After Work lo ta hopi spesial. E publiko lo haña e oportunidat pa krea konekshonnan nobo no solamente ku hende lokal pero tambe ku empresarionan internashonal. E organisadó di Network After Work, Curaçao Afro Productions, a uni forsa ku e organisashon Internationaal Ambitieus. Internationaal Ambitieus a bini ku un delegashon di 18 empresario, for di Hulanda i Surnam, pa sondia e posibilidatnan pa hasi negoshi nan Kòrsou i pa nan konektá ku empresarionan di Kòrsou. Minister Steven Martina lo ta presente pa duna nan un kaluroso bon bini.

Hopi empresario i profeshonalnan no tin un potret adekuá pa nan LinkedIn profile, website òf pa otro okashonnan formal. Jay H. Photography lo tei presente di 5.30 – 6.00, pa saka potret estilo di “headshot”, kompletamente grátis, pa esnan ku ta deseá esaki. Tene kuenta: solamente esnan ku yega na tempu lo por hasi uso di e oportunidat aki.

I pa klousura e anochi, e públiko presente lo disfrutá di un tremendo presentashon di e kantante Evita Luitsz i su banda.

Tur hende ku ta interesá pa ekspandé nan netwerk profeshonal, den un atmósfera dushi i plasentero, ta bon bini na Network After Work, Djárason 3 di Òktober, di 5.30 – 8.30 pm, na e pool bar di Avila Beach Hotel. Entrada ta kompletamente grátis. Solamente tin ku duna business card pa haña akseso grátis na Network After Work.