Durante un seremonia hopi animá ku presensia di medionan di prensa i su invitadonan, señores Rafael Otaiza i Marielis Herrera propietarionan di “Naguará” a presentá nan restorant nobo, típiko, ku sason Venezolano, na komunidat di Kòrsou. “Naguará” ta un kadena di restorant ku ta ser manehá via di e sistema di frankisia, ku a nase na 2007 na Ecuador ku e meta, pa eksportá, promové i globalisá kuminda típiko Venezolano den otro parti di mundu. Ku 4 establesimentu na Ecuador i plannan grandi di ekspanshon, awor ta toka turno na Kòrsou pa e tambe disponé di un restorant “Naguará”. E restorant ta situá den Chobolobo Shopping Center i lo ta habrí tur dia, di djaluna pa djaluna di 7’or di mainta pa 9’or di anochi, non stòp, sirbiendo desayuno, lùnch i sena. “Naguará” ta un konsepto inovadó, ku ta promové e tendensia di alimentashon salú, ku preis moderá na benefisio di henter famia. “Naguará a nase for di e vishon pa bai eksportá i globalisá e diferente kuminda típiko Venezolano. Despues di nos éksito na Ecuador, awe nos ke introdusí e konsepto aki na komunidat di Kòrsou tambe. Konsiderando e poblashon multi kultural di Kòrsou, e merkado lo ta ideal pa nos por kumpli ku nos mishon, esta, pa laga mas tantu hende posibel i mas pais sera konosí ku e gastronomia Venezolano”, señora  Marielis Herrera a deklará. “Nos spesialidatnan lo ta entre otro e konosido arepa Venezolano, kachapa, tequeño, pabellon i quesillo, pero tambe nos lo tin riba nos menú platonan internashonal manera pasta, diferente tipo di salada, karni i piska. Pues nos menú lo ta variá pa tur hende, pa henter famia i nos preisnan lo ta hopi moderá”. “Naguará” ta un restorant ku posibilidat pa akomodá su klientenan tantu parti paden den aire kondishoná, komo parti pafó riba nan tèras den aire liber. Banda di ta hasi entrega na kas, nan por asistí tambe dunando servisio di catering riba pedido pa kualke evento òf fiesta. Pa mas informashon riba e diferente servisio di “Naguará” por yama telefòn 465-2799 òf mail na gerencia@franquisianaguara.com.