WILLEMSTAD — Direktiva di AMAK a tuma nota di e tristu notisia ku e gran músiko konguero Randall Rog a bai laga nos.

Despues ku Randall a sufri kebrante di salú último tempunan, a yega e momentu ku e la entregá pa por bai gosa di un lugá privilegiá den Reino di Señor.

Randall, aunke e tin un edat hóben, tin un trayektoria impreshonante den su karera musikal. Randall a militá den masha hopi agrupashon musikal aki na Kòrsou. Entre nan nos por menshoná Explosivos, Gibi i Explosivos, GIO Fuertisimo i Tune.

Randall Rog tabata e konguero pa hopi aña di e Orkesta Nashonal bou di enkargo di Maestro Torro Colina d.f.m.

Randall Rog a fungi tambe komo dosente di perkushon den e proyekto di Instituto pa Formashon Musikal for di 2006 te ku 2013, durante kua periodo el a duna lès na vários hóben den diferente bario di Kòrsou.

Randall Rog semper tabata masha koperativo na momentunan ku e hóbennan ku e ta duna lès mester a duna un presentashon.

Semper bai músikonan profeshonal pa forma kualkier orkesta grandi den kualkier proyekto, tabata hasi uso di e servisio di Randall Rog.

Kòrsou  a pèrdè un gran baluarte musikal i nos ke deseá su esposa Tuña Rog forsa durante e momentunan difísil aki i  tabata notabel kuantu esfuerso Sra. Tuña tabata hasi pa por a logra rekuperashon di Randall. Tambe forsa na e yunan di Randall Rog i tambe su famia.

Ku alma di Randall Rog sosegá na pas.

Direktiva di AMAK