WILLEMSTAD — Mundu farandulero a risibí otro gòlpi, kaminda mester a tuma nota ku un músiko durante di su trabou ta fayesé.

Den e kaso aki nos ta menshoná Juan Encarnacion ku djasabra último na momento ku e mester a bai kumpli ku su deber komo músiko pa presentá ku e banda One Way Band na sierto momento a kuminsá sinti su mes inkómodo i no por a presentá.

Na e momento ei el a preferá di sinta un banda un ratu pa mira ku si e doló ku e tabata tin por a pasa, pero lamentablemente esaki a resultá fatal pe i no tabata tin mas espasio pa ayudo médiko ya ku ela fayesé na e sitio mes.

Juan Encarnacion a militá komo trombonista den entre otro Caribbean Band i seguidamente ku vários otro agrupashon musikal i último añanan aki e tabata presentá komo pianista den One Way Band.

Djabièrnè próksimo lo tin enterno di Juan Encarnacion. Di 1 or pa 4 or ta risibí bishita di despedida na El Tributo i ta e intenshon pa aki tambe tin un despedida musikal komo un homenahe póstumo na e defuntu.

Direktiva di AMAK ta deseá amigu i famianan di Juan Encarnacion i muy espesial na Javier Privania hopi forsa na e momento difísil aki. Ku Don Dios dun’é un lugá den su reino. Juan Sosegá na pas.

Atentamente

Direktiva di AMAK