WILLEMSTAD — Direktiva di AMAK ta manda palabranan di profundo kondolensia na Sra. Rita i yunan i tur demas famia di Harry Zimmerman na Kòrsou, Aruba i Ulanda, ku  fayesimentu di e gran baluarte musikal Harry Zimmerman. Nos ta kontentu ku e komishon enkabesá pa Jacinta Scoop – Constancia a hasi tur nan esfuerso pa Harry i su famia tabata na Kòrsou, pa asina ei haña un homenahe tur afó den su bario di Boka Sami, mei mei di tumberonan, famia, konosí nan i fanatikonan. Harry durante su trayektoria musikal a kosecha hopi popularidat den diferente banda ku  el a aktua ku n’e i na un okashon hasta e tabata tin su propio agrupashon musikal ku yama Harry Zim i su Orkesta. Harry Zimmerman ta e partisipante di tumba ku durante 31 aña sin interupshon, a kontribuí na e magno evento kultural musikal ku ta Festival di Tumba di Kòrsou. Harry Zimmerman a logra hopi éksito den Festival di Tumba i a konkista 3 biaha e korona i na vários okashon el a finalisá den e puestonan di mas haltu. Harry Zimmerman semper tabata bini ku temanan riba nos kultura, nos herensia i nos historia. Esaki kaba ta un aspekto masha balioso, ya ku pa medio di músika bo ta eduká un pueblo. Direktiva di AMAK a komprondé di Sra. di Harry Zimmerman ku e entiero ta plania pa tuma lugá djaweps awor na Aruba, pero nos ta konsiente tambe ku famianan di Harry na Kòrsou ta hasiendo máksimo esfuerso en koperashon ku Sra. di Harry pa mira ku si tin posibilidat ainda pa laga e entiero tuma lugá na Kòrsou. Esei ta un desishon ku tin ku  tuma den seno familiar. A bini sugerensianan pa durante marcha di despedida toka númeronan di Harry Zimmerman, pero direktiva ta konsiente ku e tempu ta hopi kòrtiku pa gruponan musikal kisas logra esaki, pero si lo ta posibel pa hinka algun koro i pregon di Harry den númeronan ku ta keda toka. Harry Zimmerman a fayesé promé ku temporada di Karnaval terminá i si musikalmente nos por duna honor n’e,  lo ta algu hopi grandi. Harry nos ta sigur ku bo lo haña un bon lugá den Reino di Señor Sosegá na pas.