WILLEMSTAD — Djadumingu mainta pa 5:30 Errol El Toro Colina, gran músiko profeshonal a bai sosegá. Toro a pasa algun momentunan difísil pa motibu di su malesa, pero e forma mental ku e tabata tini a keda na bida i esei a pone ku kada bes e tabata superá e difikultatnan físiko. Lamentablemente el a keda afektá últimamente ku un vírus ku a pone ku a yega un final na su bida.
Toro ta un músiko di taya Internashonal ku a dirigí orkestanan grandi na Spaña, Trinidad, Barbados, Sto. Domingo i Puerto Rico i semper el a kousa hopi atmirashon serka músikonan profeshonal ku ta tin palabranan masha respetuoso pa loke ta su areglonan.
Un di e éksitonan internashonal sigur tabata su gira pa Spaña 1985, kual aña Melania van der Veen a representá Antia Ulandes den OTI i na e okashon aki e forma ku Toro a harmonisá e piesa i a dirigí e orkesta a hasi un bon impreshon na Spaña.
Na Kòrsou tambe por bisa ku Toro durante 30 aña tabata direktor musikal na selebrashon di Dia di Bandera. Na 8 okashon e tabata un dje direktornan musikal den un kanto pa Kòrsou i durante e último 5 añanan ku a pasa e tabata dosente prinsipal di Instituto pa formashon Musikal pa loke ta trata e proyekto di formashon musikal den bario. Toro tabata duna instrukshon i guia musikal n a e dosentenan den e proyekto.
Ademas di esei Toro tabata e hòmber di teoria i sòlfeo na e hóbennan di Junior All Star i e tabata skibi huntu ku Gedeon Chandler tur e areglonan.
Un proyekto ku el a pone hopi énfasis riba dje ta pa Junior All Star graba un CD den studio i ku sumo plaser e i Gedeon Chandler tabata dirigí tur e grabashonnan. Lamentablemente el a fayesé nèt algun siman promé ku produsí e CD aki.
Na 2013 Toro Colina i Gedeon Chandler bou di direkshon di Feko Gomes a biaha pa Aruba pa aya kompartí e método di plan di trabou pa un formashon musikal efektivo, basa riba instrukshon di tur género di músika.
Toro lo bai hasi falta sigur den músika aki na Kòrsou i ta bon pa di parti di AMAK i famia bisa palabra di gratitut na tur e músikonan ku durante e último 3 simannan ku a pasa a konvivi ku salú di Toro. Un gradesimentu tambe tra bai na Gregory Colina ku tambe a duna sosten
Finalmente ta bon pa menshoná ku e aspekto sosial di e persona Toro Colina. Toro Tabata duna lès riba un base hopi regular na kas na diferente hóben i adulto sin kobra ningun sèn, pasombra e tabata konvensí ku e tambe tin ku duna su granito i traspasá su konosementu na e músikonan.
Maestro Errol Colina ya no tei mas. Ku bon Dios lo duna un lugá den su reino. Toro awor bo no tin doló mas sosegá na pas.